1擁護掃羅家族个軍隊㧯大衛家族个軍隊相㓾當久。大衛一日比一日強壯，總係掃羅个家族一日比一日衰弱。
大衛个孻仔2 大衛在希伯崙𫱔六個孻仔。照出世个順序來排：暗嫩係耶斯列人亞希暖𫱔个；
3基利押係迦密人拿霸个寡婦愛比該𫱔个；押沙龍係基述王達買个妹仔瑪迦𫱔个；
4亞多尼雅係哈及𫱔个；示法提雅係亞比她𫱔个；
5以特念係大衛个𡜵娘以格拉𫱔个。大衛這六個孻仔全部係在希伯崙出世个。
押尼珥投靠大衛6 大衛家族个軍隊㧯擁護掃羅家族个人相㓾毋識斷；在掃羅个部下當中，押尼珥元帥个勢力越來越大。
7 掃羅有一個細姐安到利斯巴，係愛亞个妹仔。有一日，掃羅个孻仔伊施波設問押尼珥：「你做麼介㧯吾爸个細姐共下睡呢？」
8這話使押尼珥非常受氣；佢講：「你想𠊎會出賣掃羅个家族係麼？𠊎敢係猶大个走狗？一開始𠊎就對若爸掃羅㧯佢个兄弟朋友忠心；𠊎乜無將你交在大衛个手中。今晡日，你卻為這婦人家來責備𠊎。
9-10上主識應許大衛愛對掃羅㧯佢个家族手中搶走王權，使大衛做以色列㧯猶大个王，對最北片个但直到最南片个別是巴。這下，𠊎若係毋完成這件事，願上帝重重責罰𠊎！」
11伊施波設非常驚押尼珥，毋敢講半句話。
12 押尼珥派人到大衛該位去，㧯佢講：「麼人想統治這國？若係你㧯𠊎講好條件，𠊎就幫助你，使以色列人全部歸順你。」
13 大衛講：「好啊！𠊎做得㧯你立約，總係𠊎有一隻要求：你來見𠊎个時，一定愛帶掃羅个妹仔米甲共下來。」
14大衛也派人去見掃羅个孻仔伊施波設，講：「將𠊎个𡜵娘米甲還𠊎啊！姖係𠊎用一百個非利士人个包皮換來个。」
15伊施波設就派人對米甲个老公 — 拉億个孻仔帕鐵該位將米甲帶走。
16老公帕鐵跈等米甲緊行緊噭，一直跈到巴戶琳。押尼珥對佢講：「你好轉了！」帕鐵就轉去。
17 押尼珥㧯以色列該兜長老講：「盡久以來，你等一直希望大衛做你等个王，
18這下，你等个機會來了。因為上主識應許大衛講：『𠊎愛用𠊎个僕人大衛來救𠊎个子民以色列脫離非利士人㧯所有仇敵个手。』」
19押尼珥也對便雅憫支族个人講共樣个話，然後到希伯崙去，將以色列人㧯便雅憫全支族所同意个事向大衛報告。
20當押尼珥帶等二十儕到希伯崙見大衛个時，大衛為佢等擺設筵席。
21押尼珥對大衛講：「這下，𠊎愛去召集全以色列人來見𠊎个主𠊎个王，㧯你立約，使你照心願統治全國。」大衛保證押尼珥个安全，然後送佢離開。
約押謀殺押尼珥22無幾久，約押㧯大衛个軍隊攻打敵人轉來，帶轉當多戰利品。總係該時押尼珥已經無在希伯崙，因為大衛已經保證佢个安全，送佢走了。
23約押㧯佢个軍隊轉到希伯崙个時，有人㧯佢講尼珥个孻仔押尼珥來見過王，王保證佢个安全，送佢走了。
24約押就去見王，講：「你做麼介恁樣？押尼珥來見你，你還送佢走？
25你愛知，尼珥个孻仔押尼珥到這位來係愛欺騙你，打探你出入个地方㧯你所做个事情。」
26 約押離開大衛以後，就派人去追押尼珥，對西拉井該位將押尼珥帶轉來；總係這事大衛並毋知。
27押尼珥轉到希伯崙个時，約押將佢帶到城門堘，詐意愛㧯佢講祕密話，就在該位刺穿佢个肚笥。恁樣，押尼珥就死掉，因為佢識㓾死約押个老弟亞撒黑。
28大衛聽到這消息，就講：「流尼珥个孻仔押尼珥个血，這罪在上主面前永遠毋會歸給𠊎㧯𠊎个國。
29願報應歸到約押㧯佢个家族身上。願約押个家族代代有人著到性病、發癩、瘸手跛腳 、戰死、餓死。」
30恁樣，約押㧯厥大老弟亞比篩㓾掉押尼珥，為到報佢等个細老弟亞撒黑在基遍戰場被押尼珥㓾死个冤仇。
埋葬押尼珥31 大衛命令約押㧯佢个部下講：「你等愛扯爛衫，著麻衫，在押尼珥棺木前悲傷大噭。」大衛王親自跈在棺木後背行。
32押尼珥葬在希伯崙。王在押尼珥墳墓前傷心到大聲噭；所有个人民也全部悲傷大噭。
33大衛王為押尼珥唱這首哀歌：
押尼珥敢應該像戇仔恁樣死？
34你个雙手無被人䌈等；
你个雙腳無被人捆等。
你就像被暴徒㓾死共樣！
所以人民又為押尼珥悲傷大噭。
35大家歸日勸大衛食東西，總係大衛發誓講：「若係𠊎在日頭落山以前食東西，願上帝重重責罰𠊎！」
36大家聽講這件事，全部當歡喜王恁樣做。事實上，王所做个每一件事大家全部當歡喜。
37該日所有跈大衛个人㧯以色列人民全部知謀殺尼珥个孻仔押尼珥這件事毋係王个意思。
38王對佢个部下講：「敢講你等毋知今晡日以色列死掉一個偉大个將軍？
39今晡日，雖然𠊎係上帝膏油設立个王，𠊎乜無辦法做麼介。洗璐雅這兩個孻仔恁強恁暴，𠊎無法應付！願上主照佢等个罪來責罰佢等！」
Who We AreWhat We EelieveWhat We Do
2025 by iamachristian.org,Inc All rights reserved.
