以斯帖記 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

猶太人个轉機

1該日，亞哈隨魯王將猶太人个敵人哈曼所有个財產全部交給王后以斯帖。末底改被人傳到王个面前，因為以斯帖㧯王講，末底改係姖个親戚。

2王將手指戴等个印仔剝下來，就係佢對哈曼該位拿轉來个，交給末底改。以斯帖也派末底改管理哈曼个財產。

3後來，以斯帖又伏落在王腳前，緊噭緊求王阻止亞甲人哈曼愛消滅猶太人个陰謀。

4王向以斯帖伸出金杖，以斯帖就企起來，講：

5「𠊎若得到國王个愛惜，王若肯，認為𠊎个要求妥當，請下一條命令，撤消亞甲人哈米大他个孻仔哈曼發出个命令，就係愛消滅國內逐省所有猶太人个命令。

6𠊎樣拌得看等𠊎个同胞受災難呢？𠊎樣拌得看等𠊎个親屬被人消滅呢？」

7 亞哈隨魯王對王后以斯帖㧯猶太人末底改講：「你看！因為哈曼陰謀愛害死猶太人，𠊎已經吊死佢，又將佢个財產交給以斯帖。

8𠊎准你等照你等个意思發通告給猶太人；你等也做得用𠊎个名義發出，又頓王印。因為用王个名義發出个通告，頂高有王个印仔，係做毋得撤消个。」

9所以，在三月，就係西彎月二十三日，末底改召來王个書記，喊佢等發通告給猶太人，還有對印度到古實總共一百二十七省个省長、總督㧯行政官員。這通告係用逐省逐族个文字㧯猶太人个語文寫个。

10末底改用亞哈隨魯王个名義，頓王印，頒佈這份通告，又命令送信个人騎王宮最遽个馬送去逐所在。

11這命令講：王准逐城市个猶太人組織起來保護自家。佢等做得除掉該兜愛攻打猶太人个一切對敵，連該兜人个𡜵娘子女也做得消滅，又做得搶走該兜人所有个財物。

12這命令愛傳到全國逐省，在十二月，就係亞達月十三、原來決定除掉猶太人該日開始有效。

13這命令愛像頒佈法律共樣公佈出去，使逐省逐族个人全部知。恁樣，猶太人做得準備好勢，在該日向佢等个敵人報仇。

14所以，送信个人奉王个命令，騎王宮最好个馬，用最遽个速度去傳命令；這命令也傳遍首都書珊城。

15 末底改著等藍色白色个朝服，披等紫色幼麻紗个外袍，戴等金个冕旒離開王宮；書珊城全城歡喜吶天。

16對猶太人來講，這實在係歡喜、快樂、尊貴、光榮个事。

17王个命令傳到逐省逐城，猶太人就歡喜快樂，辦桌席、像過節恁樣來慶祝。盡多个人因為驚猶太人就入猶太籍。