啟示錄 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

天頂个禮拜

1接等，𠊎得到另外一個異象，看到天頂有一扇開等个門。

𠊎先前所聽到、像號筒个聲，又對𠊎講：「你上這位來，𠊎愛指示你以後必定愛發生个事。」

2即時，聖靈就感動𠊎。𠊎看到天頂有一個寶座；有一位坐在寶座上。

3佢个面貌像碧玉㧯紅寶石恁樣皓光。寶座个周圍有虹圍等，色像綠寶石。

4寶座周圍有二十四個座位，頂高坐等二十四個長老，著等白色个長袍，頭那戴等金个冕旒。

5有𥍉爧、𠾐𠾐滾个聲，㧯響雷公个聲對寶座發出。寶座前𤏸等七支火把；該就係上帝个七個靈。

6寶座前還有像水晶恁樣个玻璃海。

寶座个四面有四個生物，前後全部有目珠。

7第一個生物像係獅仔；第二個像係牛牯；第三個有人个面；第四個像係飛等个鷹鳥。

8該四個生物，逐個有六隻翼胛，無論內外全部有目珠。佢等日夜緊唱：

聖哉！聖哉！聖哉！

主 — 全能个上帝，

古早存在、這下存在、

將來也永遠存在个！

9逐擺，四個生物唱榮光、尊貴、感謝个詩歌，獻給該坐在寶座上、永遠生生个，

10該時，二十四個長老就伏落去敬拜該永遠生生、坐在寶座上个。佢等將自家个冕旒放在寶座前，講：

11𠊎等个主，𠊎等个上帝！

你堪得接受榮光、尊貴、㧯權能。

因為你創造了萬有；

萬有个受造㧯生存，

完全係照你个旨意。