1過一駁仔，亞捫人个王拿轄死掉；佢个孻仔哈嫩承接佢个王位。
2大衛講：「𠊎愛對哈嫩表示友好，像厥爸拿轄對𠊎友好一樣。」所以大衛就派使者去安慰佢。
佢等到亞捫境內弔慰哈嫩王个時，
3亞捫人个領袖對哈嫩講：「你恅到大衛派這兜人來係為到尊敬若爸、向你表示安慰嗎？當然毋係！佢派佢等來係愛打探𠊎等个情況，好征服這國家。」
4 哈嫩就將大衛派去个使者捉起來，將佢等个鬍鬚剃掉，將佢等个長衫下半截到屎窟割斷，然後逐佢等離開。
5這兜人感覺當見笑，毋敢轉去。大衛聽到這事，就喊人通知佢等留在耶利哥，等鬍鬚生長正轉來。
6 亞捫人知佢等已經㧯大衛結冤仇，哈嫩㧯亞捫人就用三萬四千公斤銀仔向上美索不達米亞㧯敘利亞人个瑪迦、瑣巴請來戰車㧯騎兵。
7佢等請來三萬兩千戰車㧯瑪迦王个軍隊；這兜軍隊安營在米底巴附近。所有个亞捫人也對佢等个城肚出來，準備相㓾。
8 大衛得到消息，就命令約押帶領全軍出去相㓾。
9亞捫人出兵，聚集在佢等个京城拉巴城个門口，其他盟國該兜王就在城外擺陣。
10 約押看出敵軍會對前後兩頭來攻擊，就選出以色列最精良个部隊，喊佢等擺陣進攻敘利亞軍隊，
11將其他个部隊交給厥老弟亞比篩帶領。亞比篩指揮這兜部隊擺陣進攻亞捫人。
12約押對亞比篩講：「若係你看到敘利亞人打贏𠊎，你就過來救𠊎；若係亞捫人打贏你，𠊎就過去救你。
13愛勇敢堅強！為𠊎等个同胞㧯上帝个城鎮打拚戰鬥！願上主成全佢个旨意！」
14 約押㧯佢个部隊向前攻打；敘利亞人打輸，趕緊逃走。
15亞捫人看到敘利亞人逃走，佢等也對約押个老弟亞比篩面前逃走，退轉城肚去。約押就轉去耶路撒冷。
16 敘利亞人看到自家被以色列人打輸了，就派人將幼發拉底河東片个敘利亞軍隊調過來，交給瑣巴王哈大底謝个元帥朔法帶領。
17大衛聽到這消息就召集以色列軍隊，過約旦河，面對敘利亞軍隊準備相㓾。戰爭一開始，
18以色列人就打贏敘利亞軍隊。大衛㧯佢个軍隊㓾掉七千輛戰車个人㧯四萬步兵，又㓾掉敘利亞軍隊个元帥朔法。
19哈大底謝屬下該兜王看到自家被以色列人打輸，就㧯大衛講和，歸順佢。以後敘利亞人毋敢再㧯亞捫人𢯭手。
Who We AreWhat We EelieveWhat We Do
2025 by iamachristian.org,Inc All rights reserved.
