耶利米書 43 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶利米被人帶到埃及

1上主 — 佢等个上帝派耶利米㧯佢等講个一切話，耶利米向所有个人民一講煞，

2何沙雅个孻仔亞撒利雅、加利亞个孻仔約哈難，並所有驕傲个人就對耶利米講：「你講花撩！上主 — 𠊎等个上帝並無派你來講：『你等做毋得去埃及住。』

3這係尼利亞个孻仔巴錄煽動你出來反對𠊎等，愛將𠊎等交給巴比倫人个手中，由在佢等㓾，抑係將𠊎等捉到巴比倫去。」

4所以，加利亞个孻仔約哈難、所有个軍官，㧯其他个人全部毋肯聽從上主喊佢等住在猶大地區个命令。

5加利亞个孻仔約哈難㧯所有个軍官將賸到个猶大人，就係對各國轉來个難民全部帶到埃及去；

6其中包含男女、細人仔，㧯該兜公主。佢等也將侍衛長尼布撒拉旦留給沙番个孫仔、亞希甘个孻仔基大利管理个眾人，㧯先知耶利米，並尼利亞个孻仔巴錄，全部帶走。

7佢等毋聽從上主个命令，就入去埃及，到答比匿。

8在答比匿，上主對耶利米講：

9「你愛在猶大人面前，搬兜大石頭來，埋在答比匿王宮門前廣場个地泥下。

10然後向大家講：『𠊎 — 上主、萬軍个元帥、以色列个上帝恁樣講：𠊎愛帶𠊎个僕人巴比倫王尼布甲尼撒到這位來。𠊎愛在所埋个石頭頂，安佢个寶座；佢愛搭天篷揜等寶座。

11尼布甲尼撒會來攻打埃及。該兜該當病死个，會病死；該兜該當被人捉走个，會被人捉走；該兜該當被刀仔㓾个，會被刀仔㓾。

12𠊎愛放火燒掉埃及該兜神廟 — 巴比倫王會燒掉佢等个神廟，將神像搶走。佢愛掃淨埃及地，就像牧人撥淨外衫个跳蚤，然後安然離開。

13佢會打碎埃及日頭神廟个石柱，燒掉埃及个神廟。』」