1耶穌又㧯佢等講：「你等毋使愁；你等愛信上帝 ，也愛信𠊎。
2在吾爸个屋下有盡多房間，𠊎去係愛為你等準備所在；若毋係恁樣，𠊎就毋會恁樣講。
3𠊎去為你等準備所在以後，愛倒轉來，接你等到𠊎該位去；恁樣，𠊎在㖠位，你等也會在該位。
4𠊎愛去个所在，該條路你等知。」
5 多馬對佢講：「主啊，𠊎等毋知你愛去㖠位，樣會知該條路呢？」
6耶穌講：「𠊎就係道路、真理、生命；若毋係通過𠊎，無人能到阿爸該位去。
7既然你等識𠊎，你等也會識吾爸 。從今以後，你等識佢，也已經看到佢。」
8 腓力對耶穌講：「主啊，將阿爸顯給𠊎等看，𠊎等就滿足。」
9耶穌應講：「腓力，𠊎同你等共下恁久，你還毋識𠊎嗎？看到𠊎个人，就係看到阿爸。你樣會講『將阿爸顯給𠊎等看』呢？
10𠊎在阿爸底背，阿爸在𠊎底背，你毋信嗎？𠊎㧯你等講个話毋係𠊎自家个意思，係住在𠊎底背个阿爸做佢自家个事。
11你等愛信𠊎，𠊎在阿爸底背，阿爸在𠊎底背；若係毋信這個話，也愛因為𠊎所做个事來信。
12𠊎實在㧯你等講，信𠊎个人也會做𠊎所做个事，甚至愛做還較大个事；因為𠊎愛去阿爸該位。
13你等奉𠊎个名，無論求麼介，𠊎一定會成全你等，使阿爸个榮光通過孻仔顯明出來。
14你等奉𠊎个名，無論對𠊎求麼介，𠊎一定會成全。
應許聖靈个幫助15「你等若係敬愛𠊎，就愛遵守𠊎个命令。
16𠊎愛求阿爸，佢就會另外賜你等一位保惠師 ，永遠同你等共下。
17佢就係真理个靈。世間人毋接受佢，因為佢等看毋到佢，也毋識佢。總係你等識佢，因為佢常常㧯你等同在，也愛在你等个生命中。
18「𠊎毋會將你等㧒下做孤兒，𠊎會倒轉來你等這位。
19加無幾久，世間人就看𠊎毋到，總係你等會看得到𠊎，又因為𠊎繼續生等，你等也會生等。
20該日來到个時，你等就會知𠊎在吾爸底背，你等也在𠊎底背，像𠊎在你等个生命中一樣。
21「接受吾命令又遵守个人，就係敬愛𠊎个人。敬愛𠊎个人，吾爸必定會惜佢；𠊎也會惜佢，又親自對佢顯現。」
22 猶大 (毋係加略人猶大) 問講：「主啊，樣般單淨對𠊎等顯現，毋對世間人顯現呢？」
23耶穌應講：「敬愛𠊎个人正會遵守𠊎个話。吾爸必定會惜佢；吾爸㧯𠊎也會去佢該位，同佢共下住。
24毋敬愛𠊎个人就毋會遵守𠊎个話。你等所聽到个話毋係𠊎自家个意思，係差𠊎來个阿爸个意思。
25「𠊎還同你等共下个時，已經將這兜話㧯你等講。
26總係該保惠師，就係阿爸因為𠊎个名愛差來个聖靈，佢會將所有个事教導你等，又使你等記得𠊎㧯你等講過个一切話。
27「𠊎留下平安給你等；𠊎將𠊎个平安賜給你等。𠊎所給你等个，㧯世間人所給个無共樣。你等毋使愁，也毋使驚。
28你等聽𠊎講過：『𠊎去，總係還愛倒轉來你等這位。』假使你等敬愛𠊎，你等會因為𠊎轉去阿爸該位來歡喜，因為阿爸比𠊎較大。
29𠊎在這兜事還吂發生以前先㧯你等講，愛使你等在事情發生个時會信。
30𠊎這下毋愛㧯你等加講，因為這世間个統治者會到了。對𠊎來講，佢毋算麼介；
31總係世間人應當知𠊎敬愛吾爸，所以阿爸吩咐𠊎麼介，𠊎就做麼介。
「䟘起來，𠊎等來去！」
Who We AreWhat We EelieveWhat We Do
2025 by iamachristian.org,Inc All rights reserved.
