傳道書 1 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

人生个空虛

1在耶路撒冷做王、大衛个孻仔、傳道者 个話。

2傳道者講：空虛 ，空虛，十分空虛，

萬事全部係空虛。

3人个一生，在日頭下勞勞碌碌，

到底有麼介價值？

4一代過去，一代又來，

世界還係共樣。

5日頭出來，日頭落山，

當遽倒轉它出來个地方。

6風向南吹，又轉向北，

吹來吹去，還係轉到原來个路線。

7江河流入大海，海一直毋會滿；

江河對㖠流出來，還係倒轉去。

8人因為萬事操煩：

講話，也講毋會煞；

目珠看，看毋會飽；

耳公聽，聽毋會罅。

9發生過个事還係會發生；

做過个事還係再做。

日頭下無一項新个事。

10有㖠項事人做得講：「看啊，這係新个」？

事實上，在𠊎等出世以前早就有了。

11古早个世代，無人記得；

將來个世代，後來个人也毋會記得。

傳道者个經驗

12𠊎係傳道者；𠊎在耶路撒冷做過以色列个王。

13𠊎專心用智慧尋求、研究天下一切發生个事。

上帝給世間人个重擔樣會恁重！

14𠊎看過日頭下發生个一切；全部係空虛，係捉風。

15彎个無辦法變直；

無个做毋得算有。

16𠊎心肚恁樣想：「𠊎个智慧高過所有以前統治過耶路撒冷个人。𠊎个心了解當多智慧㧯智識。」

17𠊎用心愛分別智慧㧯戇檔、智識㧯癲狂，正知這也係捉風。

18智慧越高，煩勞越多；

智識越多，傷心越大。