1「𠊎想愛復興以色列、醫治𠊎子民个時，𠊎就看到佢等在國內㧯撒馬利亞城个罪惡：佢等欺騙、做賊，在街路打劫；
2佢等無想到𠊎會記得這一切个罪惡；佢等罪惡滿滿，全部顯明在𠊎个面前。」
宮廷內鬥3上主講：「佢等做壞事來使君王歡喜，講花撩來使領袖快樂。
4佢等全部悖逆、無忠心。佢等个罪惡像火爐肚熻等个火，做餅師傅在麵團發起來以前，還毋敢去攪挺動，俾火猛起來。
5國王有喜事个時，佢等使領袖啉釅酒到發酒癲，連國王也被佢等騙到，去㧯背叛个人牽手。
6佢等个陰謀像熻在火爐肚个火，歸暗晡出煙，天光火𤏸到當猛。
7「佢等像當猛个火將佢等个領袖燒掉。君王也一個一個被佢等打橫掉，總係無一儕向𠊎求幫助。」
以色列㧯列國8上主講：「以色列人㧯外邦人摻雜共下，像焙个餅無揙面、半生熟。
9佢等倚靠周圍个國家，反轉被所倚靠个勢力吞食掉。佢等像頭那毛緊白，也毋知自家个死期會到了。
10以色列人个驕傲就係佢等得罪个證據。雖然恁樣，佢等還係毋歸向𠊎 — 上主，佢等个上帝，還係毋尋求𠊎。
11以色列人像戇月鴿仔飛來飛去；佢等向埃及求幫助，又向亞述求幫助。
12𠊎愛在路項設羅網，像捉鳥仔恁樣來捉佢等。𠊎聽佢等在聚集簽約个時，𠊎愛責罰佢等。
13「慘了！佢等愛堵到災難了！因為佢等離開𠊎。佢等會被人毀滅了，因為佢等悖逆𠊎。𠊎想愛拯救佢等，總係佢等講白賊反對𠊎。
14佢等毋係真心向𠊎祈求，反轉學異教徒在眠床頂盡喊盡嘶；佢等割傷自家，來求五榖美酒。佢等實在係叛徒！
15係𠊎養育佢等，使佢等強壯，總係佢等顛倒圖謀反抗𠊎。
16佢等一直悖逆𠊎，去跈該兜無路用个神明 。佢等㧯扭歪掉个弓共樣用毋得。佢等个領袖會死在刀下，因為佢等講驕傲个話。這事愛成做埃及人个笑柄。」
Who We AreWhat We EelieveWhat We Do
2025 by iamachristian.org,Inc All rights reserved.
