希伯來書 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1大祭司全部係對民間選出來个；佢个任務係代人民事奉上帝，為佢等个罪獻禮物㧯祭物。

2大祭司自家也有各種个軟弱，所以佢會和和氣氣對待該兜無知來犯罪个人。

3同時，因為佢自家个軟弱，佢毋單淨愛為人民个罪獻祭，也愛為自家个罪獻祭。

4大祭司个尊榮地位，人做毋得自家去爭取；唯有上帝所選召个人正做得做大祭司，像亞倫一樣。

5共樣，基督做大祭司个尊榮地位也毋係自家爭取來个；顛倒，係上帝對佢講：

你係𠊎个孻仔；

今晡日𠊎做你个阿爸。

6佢又在另外一所在講：

你愛照麥基洗德个體制，

永遠做祭司。

7耶穌在世間个時，識對該能救佢脫離死亡个上帝大聲祈禱，流目汁祈求。因為佢个謙卑㧯虔誠，上帝聽佢个祈求。

8雖然佢係上帝个孻仔，還係愛對所受个苦難來學順服。

9既然上帝使佢達到完全个地步，佢就成做一切順服佢个人永遠得救个根源；

10上帝就宣佈佢照麥基洗德个體制做大祭司。

警戒悖逆真道个人

11關係這個事，𠊎等還有好多愛講个，總係盡難對你等說明清楚，因為你等聽毋入耳。

12你等早就應該做人个先生囉，總係你等還需要人用上帝真道个初步道理再教你等；你等還係需要食乳，無法度食飯。

13只有食乳个還係孲𤘅仔，毋會分別是非。

14長大成人个正有法度食飯；佢等已經有豐富个經驗，會分別好壞。