詩篇 52 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝个審判㧯恩典 以東人多益報告掃羅王講：「大衛去到亞希米勒屋下。」該時，大衛做這首教訓詩，交給聖歌隊長。

1有權勢个人啊，你做麼介誇口所做个壞事呢？

上帝个慈愛係永遠毋會改變个。

2你个舌乸像磨利个剃頭刀；

你一直製造是非傷害別人。

3你好邪惡，惱良善；

你愛虛假，恨真理。

4你這個花撩牯啊，

樣恁愛中傷別人！

5因為恁樣，上帝愛徹底消滅你；

佢愛捉你，將你對屋下揪出來，

將你對世人中連頭帶根挷掉。

6義人看到就會著驚；

佢等會笑你，講：

7「看啊，這就係無倚靠上帝个人；

佢倚靠自家个錢多，做壞事堅立自家。」

8總係𠊎，𠊎像種在上帝屋下茂盛个橄欖樹；

𠊎永永遠遠倚靠上帝不變个慈愛。

9上帝啊，𠊎愛永遠感謝你所做个一切；

𠊎愛在你忠心个子民中傳揚你个好名聲。