雅歌 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1願你像吾親兄弟，

食過吾姆个乳；

恁樣，𠊎在街項堵到你个時，

㧯你唚嘴，就無人會看輕𠊎。

2𠊎愛𢱋你入吾姆个屋下，

俾你來教𠊎愛樣般惜你。

𠊎愛給你啉𠊎石榴做个酒，

這個酒係有摻香料去做个。

3佢用左手托等𠊎个頭那，

用右手揇等𠊎。

4 耶路撒冷个細妹仔啊，請答應𠊎，

莫吵𠊎等，毋好㩢耍𠊎等，

俾𠊎等个愛情自由發展。第六首(耶路撒冷个細妹仔)

5該憑等姖个情郎，

對曠野上來个人係麼人呢？

(新娘)

在蘋果樹下，𠊎將你喊醒。

在該位，若姆將你𫱔出來，

若姆為到𫱔你忍受痛苦。

6求你將𠊎像印仔掛在若胸前，

像禁指印仔戴在若手指項。

愛情就像死恁堅強；

戀情像陰間恁堅固 。

它所爆出來个火花，

就像烈火恁樣盡燒 。

7水潑毋烏个愛情，

大水也無法浸掉。

若用全部家產換愛情，

這人 一定會被人藐視。

(新娘个兄弟)

8𠊎等屋下有個老妹，

姖个乳菇還吂發育。

後生人來提親該日，

𠊎等愛樣般正好呢？

9姖若係圍牆，

𠊎等愛在圍牆頂起銀塔；

姖若係一扇門，

𠊎等愛用香柏樹枋來圍等姖。

(新娘)

10𠊎就係圍牆，

𠊎个乳菇像頂高个高塔。

𠊎个情郎知，

𠊎會帶來 美滿幸福。

(新郎)

11 所羅門在巴力‧哈們有一垤葡萄園，

佢將這葡萄園租給耕種人；

該兜人逐儕愛納一千隻銀幣。

12 所羅門哪，一千隻銀幣歸給你，

兩百隻銀幣歸給耕種个人；

總係𠊎得到𠊎自家个葡萄園！

13𠊎个情妹，你住在園中，

朋友全部聽你講話，

求你使𠊎也聽得到你个聲。

(新娘)

14𠊎个情郎，遽遽來啊，

像一隻羚羊，

像一隻細鹿仔，

在香草山頂。