以賽亞書 54 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主對以色列个痛惜

1 耶路撒冷啊，愛歡喜唱歌；

你像係毋會𫱔个婦人家，

毋識因為𫱔子痛到盡嘶，

總係這下你愛歡喜唱歌，大聲盡喊。

該受冷落孤單个婦人家會有盡多子孫，

比一直有老公共下个婦人家𫱔還較多！

這係上主講个。

2你搭帳篷个地愛較大兜仔，

你搭个帳篷愛較闊兜仔，

索仔愛較長兜仔，杚仔愛釘較住兜仔。

3愛向左右擴張你个土地。

列國佔去个土地，你个子孫會倒轉來住；

荒涼个城市會有盡多人住。

4毋使驚，你毋會再堵到見笑；

你毋會再被人侮辱。

你會毋記得後生時堵到个見笑，

你毋會再想起做寡婦時所受个侮辱。

5你个創造主係若老公；

佢个名係上主 — 萬軍个元帥。

以色列神聖个上帝係你个救贖者；

佢係統治全世界个神。

6 以色列啊，你像一個後生个𡜵娘人，

被老公㧒掉，當傷心又盡憂愁。

總係上主愛喊你轉來，

你个上帝恁樣講：

7𠊎雖然暫時離開你，

總係𠊎非常痛惜你，愛接你轉來。

8𠊎大發譴、揞面毋搭你係一下仔定定；

總係𠊎愛用永遠个慈愛憐憫你。

上主 — 你个救贖者恁樣宣佈了。

9在挪亞个時，𠊎識發誓，

毋會再用發大水來浸掉世界。

這下𠊎發誓毋會再向你發譴，

毋會再責備你。

10大山會挺動，細山也做得徙開；

總係𠊎不變个慈愛毋會離開你，

𠊎平安个約也一定毋會改變。

憐憫你个上主恁樣宣佈了。

耶路撒冷个將來

11上主講：

耶路撒冷，你這被大風吹打困苦个城啊，

無人來安慰你。

看啊，𠊎愛用彩色个石頭來重建你，

用寶石來打你个地基。

12𠊎愛用紅寶石起你个城樓，

用會發亮光个寶石做城門；

四圍个城牆全部鑲滿珠寶。

13上主愛親自教導你个子女，

賜佢等大平安。

14施行正義會使你變盡強大，

毋會再有人來侵略你，害你著驚；

你毋會再堵到得人驚个事，

得人驚个事會遠遠離開你。

15𠊎毋會俾人攻擊你；

㧯你相㓾个一定會向你投降。

16𠊎創造打鐵師傅，

俾佢歕火爐，打造武器。

該㓾人、毀滅人个，

也係𠊎創造个。

17總係無一樣武器有可能傷害你；

在審判个時告你个人，

你定著會打贏佢。

這一切係上主僕人个產業，

係佢等對𠊎得到个正義 。

𠊎 — 上主恁樣宣佈了。