尼希米記 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

尼希米贏過阻擋工作个人

1 參巴拉聽到𠊎等猶太人已經開始修整城牆，就大發譴，又恥笑𠊎等。

2佢在同伴㧯撒馬利亞軍隊面前講：「這兜軟弱个猶太人在做麼介呢？佢等想愛重新起這城係麼？佢等恅到通過獻祭就能在一日之內完工係麼？佢等想對燒過个瓦石堆尋石頭來起城牆係麼！」

3 亞捫人多比雅企在佢个堘頭，也跈等講：「佢等能起像樣个石牆麼？驚怕一隻狐狸上去就橫掉！」

4𠊎祈禱講：「𠊎等个上帝啊，聽佢等在笑𠊎等！求你俾佢等个恥笑歸在自家个頭那頂，佢等个財產被人搶走，佢等被人捉到外國去！

5求你毋好赦免佢等所做个壞事，莫毋記得佢等个罪惡，因為佢等在𠊎這兜修建个人面前惹你發譴 。」

6恁樣𠊎等繼續重建城牆，無幾久就起到一半恁高，因為人民全部熱心工作。

7 參巴拉㧯多比雅，並阿拉伯、亞捫、亞實突个人民，聽到𠊎等重建耶路撒冷个城牆，工作進行當遽，城牆个缺口全部會修補好，就盡無歡喜。

8佢等共下陰謀，愛來攻擊耶路撒冷，製造混亂。

9總係𠊎等向𠊎等个上帝祈禱，派人日夜看守，防備佢等。

10 猶大人有一首歌講：

工人緊來緊無力；

瓦析多到搬毋掉！

城牆樣會起得完？

11敵人想愛偷偷仔暗殺𠊎等，阻擋𠊎等个工作。

12總係，住在敵人附近个猶太人早就一擺又一擺來警告𠊎等，講起敵人个陰謀。

13所以𠊎喊民眾帶刀仔、槍、弓箭，用宗族做單位，派佢等在吂修好个城牆盡矮个所在守衛。

14𠊎巡查轉來後，就對民眾㧯佢等个領袖、官長講：「毋使驚敵人！愛記得主係至大又值得敬畏个。愛為你等个同胞、你等个𡜵娘、你等个子女，㧯你等个家園拚命。」

15敵人聽到𠊎等已經知佢等个陰謀，看出上帝已經破壞佢等个計謀。所以𠊎等大家又轉到城牆該位，逐儕繼續工作。

16該日開始，𠊎个手下一半个人工作；一半个人守衛，拿等槍、盾牌、弓箭，著等戰甲。該兜領袖全力支持猶大逐個家族。

17-18起城牆个工人，逐儕腰身繫等刀仔，連搬運建築材料个人也一手工作，一手拿等武器。歕羊角个人企在𠊎堘頭。

19𠊎對民眾、官長㧯領袖講：「這工程當大，分散當闊，𠊎等逐儕在城牆頂也離當遠。

20你等一聽到羊角，愛黏時集合到𠊎這位來。𠊎等个上帝一定會為𠊎等相㓾！」

21所以，逐日對天光到星仔出現，𠊎等有一半个人在城牆頂工作，一半个人拿等武器守衛。

22該時，𠊎又對民眾講：「逐儕㧯佢个助手全部愛在耶路撒冷過夜；恁樣，佢等暗晡頭保護𠊎等，日時頭工作。」

23𠊎暗晡歇睏个時無脫衫；𠊎个同伴、僕人、㧯衛兵也無一儕人脫衫。儕儕隨時拿等武器，連出去打水也係恁樣。