1在烏西雅个孫仔、約坦个孻仔亞哈斯做猶大王个時，戰爭發生了。敘利亞王利汛㧯利瑪利个孻仔以色列王比加聯合起來，攻打耶路撒冷，總係無法度攻下來。
2 敘利亞軍隊來到以色列
境內个消息傳到猶大王 該位，王㧯人民非常著驚，就像樹仔在狂風中搖來搖去。3所以，上主對以賽亞講：「帶等你个孻仔施亞雅述
去見亞哈斯；佢在上陂塘圳溝个出口，就係在染布工廠个大路項。4你去㧯佢講，愛注意，愛安靜，毋使驚利汛王个敘利亞軍隊。利汛王㧯利瑪利个孻仔，佢兩個人个怒氣就像兩支燒等个火把所衝出來个煙定定。
5敘利亞㧯以色列並利瑪利个孻仔結盟，設計來害你。
6佢等想愛攻打猶大，來迫猶大人投降，然後設立他比勒个孻仔做王。
7「總係𠊎 — 至高个上主恁樣宣佈：佢等个計謀一定毋會實現。
8因為大馬士革不過係敘利亞个首都；利汛王不過係大馬士革个領袖定定；無麼介了不起。論到以色列，它在六十五年內也愛被人打敗，亡國。
9撒馬利亞不過係以色列个首都；利瑪利个孻仔不過係撒馬利亞个領袖定定。無麼介了不起。
「若係你等个信心無堅強，你等一定企毋住。」
以馬內利个記號10上主又對亞哈斯講：
11「你應該向上主 — 你个上帝求一個記號；該記號可能對陰間來，也可能對天頂來。」
12 亞哈斯講：「𠊎無愛求記號；𠊎毋試探上主。」
13所以，以賽亞講：「大衛个子孫啊，你等愛聽！敢講你等俾人惱，還毋罅擺嗎？還愛俾𠊎个上帝惱係麼？
14恁樣，主愛親自賜給你等一個記號：有人家女 會懷胎𫱔孻仔 ，將佢个名安到『以馬內利』。
15到孻仔會分別是非善惡个時，佢愛 用乳油㧯蜂糖做食物。
16因為到這細孻仔會分別是非善惡以前，該兩個暴君个國家全部會荒掉。
17「上主愛降災給你、你个人民，㧯你个家族；這種災難，自以色列國對猶大國分裂出來後，無發生過；佢愛使亞述皇帝來攻打你个國家。
18「該時，上主愛歕口哨呼喊埃及人來，像烏蠅對遠遠个尼羅河源頭飛來；佢也愛喊亞述人像蜂仔恁樣對佢等个本土來。
19佢等會歸群飛來，充滿山壢、山窿㧯巖石；佢等會遮掉所有个竻篷㧯所有个草原。
20「該時節，主愛對幼發拉底河該片請一個剃頭師傅來 — 就係亞述皇帝。佢愛剃掉你等个頭那毛、腳毛㧯鬍鬚。
21「該時節，一個農民做得保留一隻牛乸㧯兩隻山羊乸；
22佢會有足額个乳㧯乳油食。凡係在這擺國難中賸到个人全部會有乳油㧯蜂糖好食。
23「該時節，種過一千頭葡萄樹、價值一千銀仔个好果園，也會生滿竻仔㧯蒺藜。
24人會帶弓箭入去打獵，因為滿地係竻仔㧯蒺藜。
25以前用钁頭耕種个山岡，你會驚竻仔㧯蒺藜，卻毋敢到該位去，只有用來畜牛羊、由在牠兜去踐踏。」
Who We AreWhat We EelieveWhat We Do
2025 by iamachristian.org,Inc All rights reserved.
