以斯拉記 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

阻擋重建聖殿

1 猶大㧯便雅憫人个仇敵一聽講流亡轉來个人重建上主 — 以色列上帝个聖殿，

2就去見所羅巴伯㧯該兜族長，講：「俾𠊎等加入你等起聖殿个工作好麼！因為𠊎等㧯你等敬拜个係共一位上帝。自從亞述皇帝以撒哈頓帶𠊎等到這以後，𠊎等一直向上帝獻祭。」

3 所羅巴伯、耶書亞，還有其他以色列个族長對佢等講：「你等做毋得加入，來為上主 — 𠊎等个上帝起聖殿。𠊎等愛照波斯皇帝塞魯士个吩咐，自家來起。」

4所以，猶太人起聖殿个時，該地方个人阻擋恐嚇佢等。

5對波斯皇帝塞魯士當政直到波斯皇帝大流士當政期間 ，該兜人還常常收買波斯政府个官員來擾亂佢等。

阻擋重建耶路撒冷

6 亞哈隨魯皇帝執政無幾久，猶大㧯耶路撒冷人民个仇敵帶等狀仔去告佢等。

7另外，在波斯皇帝亞達薛西年間，比施蘭、米特利達、他別㧯佢共黨个寫信仔給皇帝；這信仔係用亞蘭文 寫个，讀个時正翻做波斯話 。

8省長利宏㧯省祕書伸帥也寫好恁樣一封告耶路撒冷人个狀仔，給亞達薛西皇帝：

9「省長利宏、省祕書伸帥，㧯𠊎等个同伴 — 該兜法官㧯其他對以力、巴比倫、㧯以攔地个書珊徙來个部下，

10連被偉大尊貴个亞斯那巴對故鄉徙來住在撒馬利亞㧯河西省 該兜人民，共下寫信仔。」

11書信个內容係：

「河西省个人民上奏亞達薛西皇帝。

12「𠊎等希望皇帝知：對皇帝治理个其他地區徙來住在耶路撒冷个猶太人當在重建該座邪惡、悖逆个城。佢等已經開始起城牆，盡遽就會完工了。

13皇帝啊，這城若有一日起好，城牆完工，該兜人就毋會再進貢，納各種稅了；皇帝个國庫收入一定會減少。

14因為𠊎等係臣僕，對皇帝有義務，無愛看到皇帝食虧，所以向皇帝建議，

15請皇帝吩咐人調查先王个記錄。恁樣，你就會發現這城一直係悖逆个，自古以來損害列王㧯逐省个官長。這城个人民全部係當難管个。因為恁樣，這城識被人拆掉。

16𠊎等愛皇帝知，若係這城重建起來，城牆整好，皇帝就無法度再管河西省了。」

17皇帝个回信係恁樣：

「利宏省長、伸帥省祕書、住在撒馬利亞㧯河西省地區个官員平安：

18「你等送上來个狀仔已經有人翻譯，讀給𠊎聽了。

19𠊎下令調查，確實發現耶路撒冷自古以來就係悖逆王權个；該城充滿造反㧯暴動个事。

20耶路撒冷識有大能个君王統治過該城㧯歸隻河西省，並徵收各種稅。

21所以，你等愛宣佈命令，阻擋該城个重建，直到𠊎頒佈命令為止。

22你等愛謹慎處理這事，做毋得延纏，免得𠊎受更重个損失。」

23 利宏、伸帥㧯佢等个共黨一聽到亞達薛西皇帝个回信，就黏時到耶路撒冷，用武力迫猶太人停工。

恢復重建聖殿个工作

24在耶路撒冷重建上帝聖殿个工程受迫停工，無法度繼續進行，直到波斯皇帝大流士統治个第二年。