1哈利路亞！
愛感謝上主，因為佢係至善；
佢个慈愛永遠長存！
2上主所做个大事，麼人講得盡？
有麼人能講明佢一切个美善？
3行事公平、一直伸張公義个，
這種个人實在有福氣！
4上主啊，你好款待你子民个時，
求你顧念𠊎；
你拯救佢等个時，
求你幫助𠊎。
5求你俾𠊎看到你選民个幸福，
也愛俾𠊎分享你子民个歡喜，
俾𠊎同屬你个人共下頌讚你。
6𠊎等同祖先一樣犯了罪；
𠊎等攏總作惡、做壞事。
7𠊎等个祖先在埃及个時，
毋明白上帝奇妙个作為；
佢等毋記得佢豐盛个慈愛，
反轉在紅海前就悖逆全能者 。
8總係，上帝還係因為佢个名救佢等，
為到愛顯明佢自家个大權能。
9佢責備紅海，海水就燥掉；
佢帶佢等對海底行過去，像行燥地。
10佢救佢等脫離怨恨佢等个人；
佢對仇敵个手中救佢等出來。
11水將仇敵淹死；
連一儕也無賸。
12該時，佢等正相信佢个應許；
因為恁樣，佢等唱歌頌讚佢。
13佢等盡遽就毋記得佢个作為；
佢等黏時就毋肯等候佢个旨意。
14在曠野，佢等充滿貪食个心，
在沙漠，佢等試探上帝。
15佢照佢等所求个賜給佢等；
總係，佢也降下病痛在佢等中間。
16在營房中佢等嫉妒摩西，
㧯上主分別為聖个亞倫。
17地就裂開，將大坍吞落去，
將亞比蘭㧯佢全家生埋。
18有火降在佢等同伴个身上，
將該兜作惡个人燒死淨淨。
19佢等在何烈山鑄造牛像，
跪拜人个手所做个偶像。
20佢等將上帝个榮光，
換做食草个牛个像。
21佢等毋記得救佢等个上帝，
就係在埃及行大事个上帝。
22佢識在含个地方行神蹟，
識在紅海行得人驚个事。
23上帝講佢愛消滅佢个子民該時，
佢揀選个僕人摩西企在佢面前，
同佢爭論，求佢收回佢个大發譴，
正解除以色列人受消滅个危機。
24後來，佢等藐視該美好个地；
佢等對上帝个應許無信心。
25佢等在自家个帳篷肚埋怨，
毋肯聽從上主个話。
26佢就嚴嚴警告佢等：
愛使佢等橫在曠野，
27使佢等个子孫散到列國，
使佢等流亡到外國去。
28後來，上帝个子民在批珥拜巴力，
食該兜拜過死人 个祭物。
29佢等个行為惹上主大發譴，
就有瘟疫在佢等當中流行。
30總係非尼哈䟘起來刑罰罪，
恁樣，瘟疫正無繼續遰下去。
31這件事就算做佢个義，
對該時直到世世代代。
32佢等也在米利巴泉水該位，
激上主發譴，害摩西受連累。
33因為佢等刺傷摩西个心 ，
害到佢講無應該講个話。
34佢等違背上主个命令，
無將該兜外族人消滅，
35反轉去㧯佢等通婚，
學佢等个風俗習慣。
36上帝个子民還去拜偶像，
這就係佢等滅亡个原因。
37佢等將親生个子女犧牲，
做祭物獻給迦南个鬼神。
38佢等㓾無辜个人，
流自家子女个血，
將佢等獻給迦南个偶像，
該地方被所流个血打垃圾。
39佢等个行為也將自家打垃圾，
在上帝面前做悖逆變節个人。
40所以，上主對佢等發譴；
佢盡惱佢自家个子民。
41佢使佢等落在外族人个手中；
佢由在佢等个敵人轄制佢等。
42佢等被仇敵欺壓，
被仇敵撳到貼貼。
43上主拯救佢等盡多擺，
總係佢等計謀悖逆佢，
陷落罪惡中，緊來緊深。
44總係，佢顧念佢等个苦難；
佢等一求喊，佢就聽佢等。
45為到佢等，上主想起佢个契約；
照佢豐盛个慈愛，佢回心轉意。
46佢使捉佢等去个人全部憐憫佢等。
47上主 — 𠊎等个上帝啊，拯救𠊎等！
求你將𠊎等對列國聚集起來，
使𠊎等有好頌讚你个聖名，
用感謝你來做𠊎等个榮光！
48願上主 — 以色列个上帝受稱頌，
對永遠到永遠！
願萬民同聲來講：
「阿愐！」
哈利路亞！
Who We AreWhat We EelieveWhat We Do
2025 by iamachristian.org,Inc All rights reserved.
