耶利米書 28 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶利米㧯假先知哈拿尼雅

1該年，就係西底家做猶大王初期个第四年五月，基遍人押朔个孻仔先知哈拿尼雅在上主个聖殿肚㧯𠊎講話。

2佢在該兜祭司並眾人面前㧯𠊎講：「上主 — 萬軍个元帥、以色列个上帝恁樣講：𠊎已經打碎巴比倫王个軛。

3兩年內，𠊎愛將巴比倫王尼布甲尼撒搶到巴比倫去个聖殿用品全部運轉來這所在。

4𠊎也愛將猶大王約雅敬个孻仔約雅斤

，還有㧯佢共下被人捉到巴比倫个猶大人全部帶轉來。𠊎確實愛打碎巴比倫王个軛。𠊎 — 上主恁樣宣佈了。」

5接等，在該兜祭司㧯在聖殿肚企等个眾人面前，先知耶利米向先知哈拿尼雅講：

6「阿愐！願上主照你个話來成就這個事！𠊎希望上主會實現你个預言，將聖殿个寶物㧯所有被人捉去个人對巴比倫帶轉這所在。

7總係你愛注意聽𠊎向你㧯眾人講个話。

8自古以來，在你𠊎以前該兜先知預言有戰爭、災難、並發瘟會臨到盡多地方㧯強國。

9所以，預言和平个先知定著愛等到預言實現，人正會承認佢確實係上主所派个先知。」

10然後，先知哈拿尼雅將先知耶利米頸筋項个軛拿下來，拗斷掉，

11在眾人面前講：「上主講過，佢愛照樣拗斷巴比倫王尼布甲尼撒加給各國个軛；佢會在兩年內實現這事。」先知耶利米就離開該所在。

12先知哈拿尼雅將先知耶利米頸筋項个軛拗斷後，上主喊耶利米

13去㧯哈拿尼雅講：「上主講，雖然你拗得斷樹仔做个軛，總係佢 會另外做一隻鐵个軛來換。

14上主 — 萬軍个元帥、以色列个上帝講過，佢愛將鐵做个軛加給各國；它兜會服事巴比倫王尼布甲尼撒。上主講，佢連野獸也愛交給尼布甲尼撒王管理。」

15先知耶利米又向先知哈拿尼雅講：「哈拿尼雅啊，你聽好！上主並無派你，總係你害這兜人相信你講个花撩。

16所以上主講，佢愛消滅你。你今年內就會無命，因為你講悖逆上主个話。」

17該年七月，先知哈拿尼雅斷真就死掉。