1細妹仔當中最靚个，
你个情郎走㖠位去？
你个情郎對㖠條路去，
𠊎等好㧯你共下去尋佢。
(新娘)2𠊎个情郎去自家个園肚 ，
花園當開等香花。
佢在園肚掌羊仔，
摘百合花。
3𠊎屬𠊎个情郎，吾情郎也屬𠊎；
佢在百合花當中掌羊仔。
第五首(新郎)4𠊎个情妹，你像得撒恁靚！
也像耶路撒冷恁得人惜！
像擎大旗个軍隊恁威風！
5你个目珠莫恁樣緊看𠊎，
因為會害𠊎心肝亂躁躁。
你个頭那毛像一群烏山羊，
對基列山頂緊行等下來个樣。
6你个牙齒像正剪過毛个羊，
全部洗到白淨白淨上來；
它兜雙雙對對排等，
一支牙齒都無缺掉。
7你兩片个面頰卵在面紗後背，
紅潤到像分做兩析个石榴。
8君王有王后六十個，嬪妃八十個，
還有無數个宮女。
9總係𠊎只有愛𠊎情妹一儕；
姖像月鴿仔恁得人惜。
姖係厥姆獨一个寶貝，
厥姆最惜个。
該兜細妹仔看到姖全部講姖當有福氣；
該兜王后㧯嬪妃也攏總讚美姖。
10該出現就像朝晨頭个光係麼人呢？
像月光恁靚！像日頭恁光！
像擎大旗个軍隊恁威風！
11𠊎下去到杏樹園，
愛巡山壢肚个樹秧，
看葡萄樹綻筍吂，
看石榴樹開花吂。
12毋多知仔，𠊎心所想个使𠊎就像勇士盡趕戰車愛去上戰場。(耶路撒冷个細妹仔)
13轉來啊，轉來啊，書拉蜜个細妹仔啊，
轉來 俾𠊎等看到你。
(新娘)你等做麼介愛緊看等𠊎這書拉蜜个細妹仔啊，
就像𠊎在兩隊人中間跳舞呢？
Who We AreWhat We EelieveWhat We Do
2025 by iamachristian.org,Inc All rights reserved.
