歌羅西書 1 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1𠊎係保羅；𠊎奉上帝个旨意做基督耶穌个使徒。𠊎㧯提摩太兄弟

2寫信仔給你等在歌羅西个聖徒，就係在基督底背忠心个眾兄弟姊妹。

願𠊎等个阿爸上帝賜恩典、平安給你等！

感謝个祈禱

3為你等祈禱个時，𠊎等常常感謝上帝，就係𠊎等个主耶穌基督个阿爸；

4因為𠊎等聽講你等對基督耶穌个信心，㧯對所有聖徒个愛心。

5一開始，福音个真道傳到你等該位个時，你等就聽到這福音所帶來个盼望。恁樣，你等个信心㧯愛心係用為你等保存在天頂个盼望做根據个。

6這福音毋單淨傳到你等該位，也傳遍全世界，一直長大並結果子，就像當日你等聽到也正經知上帝恩典个時，長大並結果子一樣。

7你等係對𠊎等所親愛个同工以巴弗學到這福音；佢代𠊎等 做基督忠心个僕人。

8有關聖靈賜給你等愛心个消息就係佢㧯𠊎等講个。

9因為恁樣，自從聽到關係你等个消息，𠊎等就為你等祈禱，毋識停。𠊎等求上帝賜你等各樣屬靈个智慧㧯聰明，好俾你等充份了解佢个旨意。

10恁樣，你等个生活就會合主个要求，凡事俾佢歡喜。同時，你等个生活會結各種美善个果子，你等對上帝个認識也會增加。

11願你等對佢榮耀个權能得到力量，成做堅強个人，有耐心好忍受萬項事。你等也愛用歡喜个心

12感謝天頂个阿爸，因為佢使你等 有資格同眾聖徒共下享受佢在光明个國所保留个福氣。

13佢救𠊎等脫離烏暗个權勢，使𠊎等生活在佢所惜个孻仔个國底背。

14通過佢所惜个孻仔，𠊎等得到救贖，罪得到赦免。

基督㧯佢个工作

15基督係該看毋到个上帝个形像，係超過萬有个長子。

16通過佢，上帝創造天地萬物，無論係看得到个抑係看毋到个，包含靈界該兜在位者、統治者、執政者，㧯掌權者。通過佢，也為到佢，上帝創造全宇宙。

17基督在萬有之先；萬有也係靠佢和諧來連結。

18佢係教會个頭，就係厥身體个頭；佢係新生命个源頭。佢係長子，最先對死復活，好俾佢在萬有頂高坐大位。

19上帝歡喜使佢一切个豐盛住在佢个孻仔底背。

20通過孻仔，上帝決意使全宇宙㧯佢自家再和好。上帝通過佢个孻仔在十字架頂流血到死來成就和平，使天地萬物重新歸屬佢。

21頭擺，因為言行思想个邪惡，你等遠離上帝，做佢个仇敵。

22這下，通過佢个孻仔肉體个死，上帝使你等成做佢个朋友，愛使你等在佢面前做聖潔、無缺點、無好嫌个人。

23你等所愛做个，就係堅持信仰，企在堅固个基礎頂高；毋好放掉當初領受福音个時所得到个盼望。這下，這福音已經傳遍全世界；𠊎 — 保羅就係這福音个僕人。

保羅做教會个僕人

24𠊎這下感覺為你等受苦係盡快樂个事；因為𠊎肉體受苦，係愛補滿基督為自家个身體 — 就係為佢个教會，所忍受總係吂完成个苦難。

25為到你等个利益，上帝將這個職務交給𠊎，喊𠊎做教會个僕人。這職務係愛𠊎將上帝个道理傳揚到盡圓滿；

26這道理就係佢世世代代對人類隱藏个奧秘；這奧秘這下已經對佢个眾聖徒顯明出來。

27上帝个計劃係愛佢等知，這豐盛又榮耀个奧秘係愛給全人類个。這奧秘就係：基督在你等个生命底背，這就係講，你等會享受上帝个榮耀 。

28因為恁樣，𠊎等對所有个人傳揚基督，用各樣个智慧勸大家、教大家，為到愛使逐儕成做成熟个基督徒，帶佢等到上帝个面前。

29為到達成這個目的，𠊎用基督賜給𠊎个大能力，無嫌勞苦，盡力工作。