阿摩司書 3 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 以色列人啊，你等愛聽上主攻擊你等全國人民所講个話。上主識對埃及將你等𢱋出來；

2佢講：「在全世界恁多國家中，𠊎只有選你等，你等還犯恁多个罪；所以𠊎一定愛責罰你等。」

先知个任務

3兩儕若毋相湊，

樣會共下行呢？

4獅仔若無捉到獵物，

樣會在樹林中吼吼滾？

勇壯个獅仔無捉到東西，

樣會在窿肚盡吼？

5若係捉鳥仔个機關無放食物，

樣般捉得到鳥仔？

若係無東西動到機關，

它樣會跳起來？

6作戰个警報一響，

城肚个人敢會毋驚？

若毋係上主个旨意，

災禍會臨到該城嗎？

7至高个上主愛有行動个時，

一定先將計劃㧯佢个僕人 — 該兜先知講。

8獅仔吼吼滾个時，

麼人毋驚？

至高个上主講話个時，

麼人敢毋傳預言呢？

撒馬利亞慘了

9你去向該兜住在埃及㧯亞實突王宮肚个人宣佈：「你等愛在撒馬利亞个山頂集合，看城肚所發生混亂、欺壓个事。」

10上主恁樣講：「該兜人在佢等个城堡堆滿搶來㧯剝削个財物；佢等毋知麼介安到公當。

11所以，敵人會包圍佢等个城市，破壞佢等个防線，搶佢等个城堡。」

12上主恁樣講：「就像牧羊人只有對獅仔个嘴肚搶轉兩支羊腳抑係半隻耳公定定，在撒馬利亞過奢華生活 个以色列人也只有少數有可能對災難中得到拯救。」

13至高个上主 — 萬軍个元帥上帝講：「愛聽！愛警告雅各个後代：

14𠊎責罰以色列所犯个罪時，𠊎愛拆掉伯特利城个祭壇；祭壇个四隻角會被人敲掉，跌在地上。

15𠊎愛拆掉佢等避暑个別莊㧯避寒个暖房；象牙裝璜个屋㧯盡靚个大屋全部會橫到貼貼。」上主恁樣宣佈了。