歷代志下 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

所羅門个成就(列王紀上 9:10-28)

1 所羅門用二十年个時間起上主个聖殿㧯王宮。

2所羅門也重新整希蘭王送給佢个城，將以色列人安頓在該兜城肚。

3所羅門佔領哈馬‧瑣巴地區，

4建設在曠野个巴美拉城 ，也重建哈馬境內所有囤貨物个城市。

5佢也重建以下个城市：上伯‧和崙㧯下伯‧和崙 (有城門、做得閂个防衛城)、

6巴拉城、所有囤貨物个城市、放戰車㧯戰馬个城市。佢將計劃在耶路撒冷、黎巴嫩㧯國內逐所在想愛起个工程全部完成。

7-8所羅門強迫所有迦南人个後代做苦工；佢等係以色列人佔領這地時無㓾掉該兜人个後代，包含赫人、亞摩利人、比利洗人、希未人㧯耶布斯人。佢等个後代到這下還係做奴才。

9所羅門無喊以色列人做苦工，只有喊佢等做戰士、官長、戰車長㧯騎兵。

10所羅門王有兩百五十個監工，監督工人做各種建築工程。

11 所羅門將埃及王个妹仔，對大衛城徙到為姖新起个王宮肚。佢講：「𠊎个𡜵娘無應該住在以色列王大衛个王宮，因為約櫃到過个所在就係聖个。」

12 所羅門在聖殿頭前、佢所造上主个祭壇頂獻燒化祭給上主。

13佢照摩西法律个規定，為逐個聖日獻燒化祭；這兜聖日係：安息日、初一㧯三個年節 — 除酵節、七七收割節、搭寮仔節。

14佢照厥爸大衛个規定分派祭司㧯利未人逐日个工作；利未人協助祭司共下唱詩㧯擔任其他工作。佢也照神人大衛个命令將聖殿守衛分區組織起來，使佢等逐日在各城門執行任務。

15大衛所指示祭司㧯利未人有關倉庫㧯其他个工作，佢等全部徹底實行了。

16這時，所羅門所有个計劃全部完成，上主个聖殿對打地基到完工，所有个工程進行順利。

17後來，所羅門到以旬‧迦別㧯以祿去；這係在以東地區阿卡巴灣兩個海港。

18希蘭王送幾隻船去給所羅門，喊自家个官員指揮，命令經驗豐富个船員來駛。佢等㧯所羅門个官員共下行船到俄斐，對該位運轉來大約一萬五千公斤金仔給所羅門王。