詩篇 62 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

信靠上帝 大衛个詩，交給聖歌隊長，照耶杜頓个唱法。

1𠊎心神恬恬等候上帝；

𠊎个拯救係對佢來个。

2唯有佢係𠊎个磐石，𠊎个救主；

佢係𠊎个城堡，𠊎就毋會搖動。

3你等全體攻擊一個人，愛到幾時呢？

佢像斜走个圍牆、會橫个籬笆定定。

4大家一心一意想愛將佢對大位拉下來；

佢等好講花撩，滿嘴祝福，總係心咒罵佢。

5𠊎个心啊，恬恬等候上帝，

因為佢係𠊎惟一个希望。

6唯有佢係𠊎个磐石，𠊎个救主；

佢係𠊎个城堡，𠊎就毋會搖動。

7𠊎个拯救㧯光榮全部係在上帝；

佢係𠊎堅固个磐石，𠊎个避難所。

8眾百姓啊，愛時常信靠上帝，

將心意全部擺在佢个面前，

因為上帝係𠊎等个避難所。

9卑賤个人盡虛空；

富貴个人當虛假。

用秤仔來秤，全無半點重；

佢等攏總比空氣還較輕。

10你等定著毋好倚靠惡勢力，

也毋好妄想靠搶人來發財；

就算發起來，

你等个心也毋好倚靠錢財。

11𠊎再三聽上帝講過，

一切權能係屬佢个；

12主啊，不變个慈愛也係屬你个。

你一定會照逐儕所行个報應佢等。