歷代志下 16 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

亞撒王㧯敘利亞王結同盟(列王紀上 15:17-22)

1 猶大王亞撒在位个第三十六年，以色列王巴沙愛攻打猶大，就修建拉瑪做防衛城，目的係愛切斷出入猶大所有个交通。

2所以亞撒將聖殿㧯王宮寶庫肚个金銀全部運到大馬士革，到敘利亞王便‧哈達該位，對佢講：

3「若爸㧯吾爸以前係同盟，𠊎等也來立約做同盟。這兜金銀係送給你个禮物。請將你㧯以色列王巴沙个盟約廢掉，佢正會對𠊎个土地將軍隊撤走。」

4 便‧哈達同意亞撒王个建議，就派佢个元帥去攻打以色列个城市。佢等佔領以雲、但、亞伯‧伯‧瑪迦，㧯所有在拿弗他利囤貨物个城市。

5巴沙聽到所發生个事，就黏時停止修建拉瑪，豁掉該位个工程。

6所以亞撒王召集猶大逐所在个人，將巴沙在拉瑪所用个石頭、樹料全部運去修建迦巴㧯米斯巴城。

先見哈拿尼

7該時，先見哈拿尼去見猶大王亞撒，對佢講：「因為你倚靠敘利亞王，毋倚靠上主 — 你个上帝，所以你失掉機會打贏敘利亞王个軍隊。

8以前古實㧯利比亞敢毋係有強大个軍隊、又有盡多戰車㧯騎兵嗎？總係因為你倚靠上主，佢就使你贏過佢等。

9上主看顧全世界，賜力量給該兜對佢忠實个人。你做這件事實在當戇；所以對這下開始，你會一直堵到戰亂。」

10亞撒聽到就非常譴，將先見關起來。同時，亞撒開始對有兜人民當殘忍。

亞撒統治个結束(列王紀上 15:23-24)

11 亞撒在位期間所發生个事全部記在《猶大㧯以色列列王史》底背。

12亞撒做王个第三十九年，佢个腳因為發嚴重个病變跛腳；就算在該時，佢乜無求上主个幫助，單單求問醫生。

13兩年後佢死掉，

14葬在大衛城 — 佢生前為自家鑿好个石墓肚。人用香料㧯香油膏佢个屍體，又燒一堆大火向佢表示哀傷。