哈巴谷書 3 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

哈巴谷个祈禱

1這係先知哈巴谷个祈禱，調用流離歌：

2上主啊，𠊎聽到你个名聲，

心中就充滿敬畏。

求你在𠊎等个時代重新做你做過个大事，

在這兜年間顯明出來；

求你在大發譴个時還記得憐憫。

3上帝愛再對以東來；

神聖个上帝愛對巴蘭山來。

佢个榮光遮蓋天；

大地充滿頌讚佢个聲音。

4佢燦爛親像日頭。

佢个手中囥等大能力；

光線對佢手中射出來。

5在佢頭前有發瘟；

在佢後背有致死个病。

6佢一停下來，大地就挺動；

佢一注目看，萬國就緊顫。

長久存留个群山會崩掉；

一直存在个山岡會沈掉；

這兜係佢古時行過个所在 。

7𠊎看到古珊人在帳篷肚有災難，

米甸人在帳幕中愊愊掣。

8上主啊，係毋係河壩惹你發譴？

係毋係大海激你受氣？

你騎等雲像騎馬來，

駛等烏雲个戰車，

愛帶勝利給你个子民。

9你抽出弓，準備射箭；

你用河壩使大地裂開。

10群山一看到你，就緊顫；

大水對天頂倒等下來。

深淵吼吼滾，

波浪沖上天。

11你个快箭一射，𥍉爧个槍一動，

日頭㧯月光全部停下來。

12你在發譴之下𨃰過大地；

你在憤怒當中踐踏萬國。

13你出去拯救你个子民，

去拯救你選立个君王 。

你打橫壞人个領袖，

徹底消滅佢个部下 。

14佢个軍隊像大風差吹散𠊎等，

像惡霸歡喜吞食囥等个窮人；

總係你用佢个槍 刺穿佢个將軍 。

15你騎馬踐踏大海，

海水就翻滾。

16𠊎一聽到就全身緊顫，

嘴唇也愊愊掣。

𠊎个骨頭鬆掉，

腳步行毋在。

𠊎只有恬恬等災難个日仔來到，

該時上帝愛責罰攻擊𠊎等个人民。

17就算無花果樹無結果子，

葡萄樹也無打葡萄；

就算橄欖樹無打橄欖，

田地無出產五榖；

就算羊群死淨淨，

牛欄肚無半隻牛；

18𠊎還係愛因為上主歡喜，

因為上帝 — 𠊎个救主快樂。

19至高个上主賜給𠊎力量。

佢使𠊎像鹿乸腳步安穩；

佢使𠊎在高山頂自由自在。

這歌交給聖歌隊長，用絲弦个樂器伴奏。