1 提阿非羅大人：
已經有好多人提筆寫書，講起在𠊎等當中所發生 个事情。
2佢等所寫个，係照該兜一開始就親目看到又傳過這道理个人所講个。
3這一切，𠊎對頭到尾全部詳細查過，所以𠊎想愛照順序來對你報告，
4目的係愛俾你知你所學个道理係確實个。
預言施洗約翰个出世5 希律王統治猶太个時，有一個祭司，名安到撒迦利亞，係屬亞比雅祭司該班个；厥𡜵娘安到伊利莎白，也係祭司亞倫家族个後代。
6在上帝看來，佢兩公婆係正直个人，嚴格遵守主个一切誡命㧯規定。
7佢等無細人仔，因為伊利莎白毋會𫱔；佢兩儕也已經老了。
8有一日，撒迦利亞當班，在上帝面前執行祭司个職務。
9照祭司个慣例，抽籤仔个結果，佢入去主个聖殿燒香。
10佢燒香个時，眾人在外背祈禱。
11忽然，主个天使企在香壇个右片對佢顯現；
12撒迦利亞看到，嚇一下，也盡著驚。
13總係該天使對佢講：「撒迦利亞，毋使驚！上帝聽到你个祈禱了；若𡜵娘伊利莎白會為你𫱔一個孻仔，你愛將佢个名安到約翰。
14你會歡喜快樂；盡多人也會為到佢个出世來歡喜。
15將來，佢在主个面前會做偉大个人物。淡酒㧯烈酒，佢攏總做毋得啉；在阿姆个胎肚，佢就會被聖靈充滿。
16佢將來愛帶領盡多以色列人歸主 — 佢等个上帝。
17佢愛做主个先鋒，堅強有大能力，像先知以利亞一樣。佢愛使爺𡟓㧯子女重新和好，使悖逆个人回頭，行義人智慧个路；佢愛幫助人民來迎接主。」
18 撒迦利亞對天使講：「𠊎愛樣般正會知這係事實？𠊎係一個老人家，𠊎𡜵娘也恁老了。」
19天使應講：「𠊎係企在上帝面前个加百列；𠊎受派傳話給你，報你這好消息。
20總係，因為你毋信𠊎所講、時機成熟个時會實現个這兜話，你會變做啞仔；等到應許實現該日，你正會講話。」
21大家緊等撒迦利亞，毋知佢在聖殿肚做麼介延纏恁久。
22到佢出來，毋會㧯佢等講話，佢等正知佢在聖殿肚看到異象。佢比手畫腳對大家表示意思，一直毋會講話。
23在聖殿事奉个日期一滿，撒迦利亞就轉屋下去。
24過無幾久，厥𡜵娘伊利莎白正經有身項，在屋肚囥五個月。
25姖講：「恁久起來，最後主還係好款待𠊎，除掉𠊎在人面前个見笑。」
預言耶穌个出世26 伊利莎白懷胎六個月个時，上帝差天使加百列去加利利省个一座安到拿撒勒个城，
27傳話給一個童貞女，名安到馬利亞；這童貞女已經㧯大衛家族一個名安到約瑟个男人定親。
28天使到姖个面前，講：「願你平安！主㧯你同在，大大賜福給你！」
29 馬利亞因為天使个話，十分著驚，反覆思想這話係麼介意思。
30天使對姖講：「馬利亞，毋使驚，因為上帝已經賜恩典給你。
31你會懷胎，𫱔一個孻仔；你愛將佢个名安到耶穌。
32佢會成做偉大个人物，稱做至高上帝个孻仔。主 — 上帝愛將佢个祖先大衛个王位賜給佢。
33佢愛永遠做雅各个子孫个王；佢个王權無窮無盡。」
34 馬利亞對天使講：「𠊎還吂嫁人，樣般會有恁樣个事啊？」
35天使應講：「聖靈會降在你个身上；至高上帝个權能會庇蔭你。所以，對你來出世个孲𤘅仔係聖个，係上帝个孻仔。
36你看，你个親戚伊利莎白，姖雖然恁老，別人講姖毋會𫱔了，總係姖這下已經有六個月个身項。
37因為在上帝無一件事係做毋到个。」
38 馬利亞講：「𠊎係主个使女；願照你个話成就在𠊎个身上。」恁樣，天使就離開姖。
馬利亞訪問伊利莎白39無幾久後，馬利亞出發，趕緊去猶大山肚个一座城。
40姖入去撒迦利亞个屋下，對伊利莎白請安。
41伊利莎白一聽到馬利亞个請安，姖所懷个胎就緊跳。伊利莎白被聖靈充滿，
42大聲喊講：「你係婦女當中最有福氣个！你懷个胎也係有福氣个！
43𠊎个主个阿姆來看𠊎，𠊎樣般堪得哪？
44因為你請安个聲一入𠊎个耳公，𠊎所懷个胎就歡喜到緊跳。
45你確信主對你講个話一定會實現；你實在有福氣啊！」
馬利亞頌讚上帝46 馬利亞講：
「𠊎个心尊主為大；
47𠊎个靈因為上帝 — 𠊎个救主來歡喜；
48因為佢顧念佢卑微个使女。
從今以後，萬民會稱𠊎係有福氣个，
49因為全能个上帝為𠊎成大事。
佢个名係神聖个；
50佢對敬畏佢个人顯出慈悲，
直到世世代代。
51佢伸出大有權能个手，
逐走心中驕傲个人。
52佢將有勢力个王㩳下寶座，
高升卑微个人。
53佢賜好食个給肚飢个食到飽，
喊富足个空手轉去。
54-55照佢對𠊎等个祖先所講个，
佢幫助佢个僕人以色列，
來紀念佢對亞伯拉罕㧯厥子孫个應許，
就係愛用慈悲款待佢等，直到永遠！」
56 馬利亞同伊利莎白共下住差毋多三個月，然後就轉屋下去。
施洗約翰个出世57 伊利莎白个產期到，就𫱔一個孻仔。
58鄰舍㧯親戚聽到主賜給姖恁大个慈悲，就同姖共下歡喜。
59孲𤘅仔出世滿一禮拜，佢等就來為佢行割禮，想愛用厥爸个名喊佢撒迦利亞。
60總係厥姆講：「做毋得！佢愛喊做約翰。」
61親友對姖講：「你个親族當中無人安恁樣个名。」
62佢等就用手比問厥爸，愛㧯孲𤘅仔安麼介名。
63 撒迦利亞就討一垤寫字个枋仔，寫講：「佢个名安到約翰。」大家就盡奇怪。
64撒迦利亞黏時就會講話，開嘴頌讚上帝。
65鄰舍全部盡著驚。這消息傳遍全猶太个山區；
66聽到个人攏總想：「這個孲𤘅仔將來會成做樣般个人呢？」因為事實盡明，有主个權能㧯佢同在。
撒迦利亞个預言67 約翰个阿爸撒迦利亞被聖靈充滿，就傳上帝个話，講：
68「愛頌讚主 — 以色列个上帝！
因為佢看顧佢个子民，也救贖佢等。
69佢對佢僕人大衛个家中，
為𠊎等興起一個全能个救主。
70頭擺，佢識通過聖先知預言：
71佢愛拯救𠊎等脫離仇敵，
離開一切怨恨𠊎等个人个權勢。
72佢對𠊎等个祖先顯出慈悲，
來紀念佢聖个契約。
73-75佢應許𠊎等个祖先亞伯拉罕，
發誓愛拯救𠊎等脫離仇敵，
使𠊎等一生人在佢个面前，
用聖潔㧯正直來服事佢，
全無驚麼介。」
76 撒迦利亞又預言講：
「𠊎个細子啊，
你會被人稱做至高上帝个先知。
你愛做主个先鋒，為佢準備道路；
77愛去㧯佢个子民講：
因為佢等个罪得到赦免，
佢等會得到拯救。
78𠊎等个上帝有慈悲㧯憐憫；
佢愛使拯救个光 對高天臨到𠊎等，
79光照一切在死个陰影底下个人，
帶𠊎等行平安个路。」
80孲𤘅仔漸漸大，身心勇健。佢住在曠野，直到佢在以色列人面前公開活動个時。
Who We AreWhat We EelieveWhat We Do
2025 by iamachristian.org,Inc All rights reserved.
