1上主啊，求你做𠊎該兜對敵个對敵！
求你攻擊該兜攻擊𠊎个人！
2求你拿等大細个盾牌，
䟘起來幫助𠊎。
3求你擎起你个長矛㧯大斧頭，
攻擊該兜追𠊎个人。
求你對𠊎保證講：
「𠊎會救你。」
4願想愛收𠊎命个人失望見笑！
願設計愛害𠊎个人澇潰受侮辱！
5上主个使者逐佢等个時，
願佢等像礱糠被風吹散。
6上主个使者追佢等个時，
願佢等走个路又暗又滑。
7佢等無緣無故設羅網愛捉𠊎；
佢等無緣無故挖陷阱愛害𠊎。
8願災難忽然之間臨到佢等；
願佢等被自家个羅網纏到，
跌落自家挖个陷阱來滅亡。
9該時，𠊎愛因為上主來歡喜，
因為佢拯救𠊎來快樂！
10𠊎愛對心底向上主告白講：
「上主啊，麼人做得同你比呢？
你保護軟弱个人免受強暴者个欺負；
你保護軟弱窮苦个人免受壓迫者个剝削。」
11當惡个人䟘起來做假見證；
佢等盤問𠊎並無犯過个罪。
12佢等用惡報善，
害𠊎心神孤單絕望！
13先前，佢等發病个時，
𠊎著麻衫表示哀傷，
𠊎禁食來刻苦自家；
𠊎為佢等祈禱个時，頭那攋攋，
14像係為到朋友抑係兄弟悲傷；
𠊎出入哀傷，行路背痀痀，
像人為到自家个阿姆哀悼一樣。
15總係，𠊎堵到災難个時，
佢等卻聚集來嘲謔𠊎；
連𠊎毋識个人也來攻擊𠊎，
佢等緊攻擊𠊎，像愛扯掉𠊎。
16就像無天良个人嘲謔跛腳个 ，
佢等還怨恨𠊎，對𠊎咬牙切齒。
17上主啊，你愛看到幾時正出手？
求你拯救𠊎脫離佢等个迫害，
對這群獅仔中搶救𠊎个性命！
18恁樣，𠊎就在聚會中感謝你；
𠊎愛在會眾个面前讚美你。
19莫俾該兜花撩个仇敵因為𠊎个失敗笑咪咪！
莫俾無緣無故恨𠊎个因為𠊎个痛苦打眼拐！
20因為佢等無講和平个話，
反轉設計害該兜老實伯。
21佢等惡擎擎誣告𠊎，講：
「噯，噯！𠊎等親眼看到了！」
22上主啊，你已經看到了；
求你毋好恬恬毋出聲！
主啊，毋好離開𠊎恁遠！
23𠊎个上帝啊，好醒了，為𠊎來辯護；
𠊎个主啊，好䟘了，為𠊎來伸冤！
24上主 — 𠊎个上帝啊，求你照你个公義判𠊎無罪；
求你毋好俾該兜仇敵對𠊎誇口。
25莫俾佢等心肝想：
「啊哈！這就係𠊎等所愛个！」
莫俾佢等講：
「𠊎等已經將佢吞掉了！」
26願所有歡喜𠊎受苦个人澇潰受侮辱！
願所有向𠊎自高自大个人見笑失面子！
27願該兜歡喜𠊎得到伸冤个歡呼快樂！
願佢等緊講：
「上主係應當受尊崇个，
因為佢歡喜佢个僕人平安！」
28恁樣，𠊎就愛講起你个公義；
無論日夜，𠊎愛讚美你！
Who We AreWhat We EelieveWhat We Do
2025 by iamachristian.org,Inc All rights reserved.
