出埃及記 36 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1「比撒列、亞何利亞伯、㧯其他精靈个工人，就係所有蒙上主賞賜技術㧯才能、知樣般營造聖帳篷个人，全部愛按照上主个吩咐去進行各項工程。」

人民奉獻禮物

2 摩西召集比撒列、亞何利亞伯，㧯所有蒙上主賞賜才能、願意協助工作个人，吩咐佢等開工。

3佢等對摩西領走以色列人為到起聖帳篷所奉獻个全部禮物。總係，逐日朝晨，人民還係繼續帶禮物來，交給摩西。

4後來，該兜負責建築个工人暫停佢等个工作，

5去見摩西，講：「人民所獻个禮物已經超過上主吩咐个工程所需要个。」

6所以摩西命令全營，喊人民無論男女毋使再為聖帳篷奉獻；恁樣，人民正無繼續奉獻。

7因為所收到个禮物拿來完成全部个工程已經罅用，還有好賸。

起上主个聖帳篷(出埃及記 26:1-37)

8在工作人員中該兜最精靈个工人負責起聖帳篷。佢等用十幅帳幔做聖帳篷；這帳幔係用麻紗㧯藍色、紫色、深紅色个肨線刺个，又用幼秀个手工繡基路伯个圖案，

9每一幅大細相同，長十二公尺，闊兩公尺。

10佢等將五幅攣共下，成做一組，另外五幅也係恁樣。

11佢等在每一組帳幔最尾一幅个邊攣藍色个紐襻。

12佢等將五十隻紐襻攣在第一組个頭幅，另外五十隻紐襻攣在第二組个最尾一幅。

13佢等又造五十隻金鉤仔，將兩組帳幔連共下，成做歸垤帳篷。

14佢等又用山羊毛刺十一幅帳幔來做聖帳篷个篷頂。

15每一幅大細相同，長十三公尺，闊兩公尺。

16佢等將五幅攣共下，成做一組，其他六幅另外做一組。

17佢等在第一組帳幔最尾一幅个邊攣五十隻紐襻，另外一組个邊也攣五十隻紐襻。

18佢等做五十隻銅鉤仔，將兩組帳幔連起來，成做歸垤篷頂。

19佢等另外又用一垤染紅个羊牯皮㧯另外一垤盡靚个皮料造兩垤篷頂，做聖帳篷最外層个頂蓋。

20佢等用金合歡木造起聖帳篷个骨架。

21逐支骨架高四公尺、闊六十六公分，

22各有兩隻榫頭，用來連接骨架。所有个骨架全部有這種榫頭。

23佢等在聖帳篷个南片做二十支骨架，

24架底有四十隻銀座，逐支骨架有兩隻銀座固定。

25佢等又在聖帳篷个北片做二十支骨架，

26㧯四十隻銀座，逐支骨架底下兩隻銀座。

27在聖帳篷个後背，就係篷个西片，佢等造六支骨架；

28兩頭兩隻轉角加兩支骨架。

29轉角兩支骨架个下背相連接，一直連到頂頭，成做一隻轉角；兩隻轉角个兩支骨架全部係恁樣連做一下。

30所以一共有八支骨架㧯十六隻銀座，每一支骨架底下各有兩隻銀座。

31佢等又用金合歡木造十五支橫杠；聖帳篷一片个骨架有五支橫杠，

32另外一片五支；篷个後背，就係篷个西片，也有五支。

33中間个橫杠安在骨架半中央，對篷个這頭通到另外該頭。

34佢等用金包等骨架，並安金圈仔，俾橫杠穿過；橫杠也用金包等。

35佢等用麻紗㧯藍色、紫色、深紅色个肨線來刺一幅帳幔，頂高用幼秀个手工繡基路伯个圖案。

36佢等又用金合歡木造四支掛帳幔个柱仔，柱仔用金包等；柱仔頂有金鉤仔。佢等又為柱仔造四隻銀座。

37佢等又用麻紗㧯藍色、紫色、深紅色个肨線，用繡花个手工，為聖帳篷門口來刺一幅門簾。

38佢等為這幅門簾造五支柱仔，柱仔頂有鉤仔。柱頂㧯柱仔頂个槓仔全部用金包等；又為柱仔造五隻銅座。