使徒 14 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

在以哥念

1在以哥念也發生共樣个事。保羅㧯巴拿巴去猶太人个會堂；佢等个講道使盡多猶太人㧯外邦人成做信徒。

2總係該兜毋信个猶太人煽動外邦人，使佢等惱信徒。

3佢兩儕在該位住好久，大膽談論主个事。主賜給佢等行神蹟㧯奇事个能力，用恁樣證明佢等所傳關係主恩典个信息係真實个。

4城肚个眾人就分派，有兜扶猶太人，有兜扶使徒。

5該時，外邦人㧯猶太人並佢等个領袖決心愛傷害使徒，用石頭㧹死佢等。

6使徒知這個事就閃走，去呂高尼个路司得城㧯特庇城，並附近个地區，

7在該兜地方繼續傳福音。

在路司得㧯特庇

8在路司得城肚有一個人，出世就瘸腳，從來毋識行過路。

9佢坐在該位聽保羅講道。保羅注目看佢，看出佢有信心，會得到醫好，

10就大聲講：「你䟘起來，企直！」該人就跳起來，開始行路。

11眾人看到保羅所做个事，就用呂高尼話大聲喊講：「神明化身變做人，降臨在𠊎等个中間囉！」

12佢等就喊巴拿巴「宙斯」，喊保羅「希耳米」，因為佢帶頭講話。

13城外宙斯廟个祭司牽等牛，帶等花，來到城門口，愛同眾人共下獻祭給使徒。

14 巴拿巴㧯保羅聽到佢等想愛做个事，就扯爛衫，跳入人群，大聲講：

15「各位，你等做麼介做這兜事呢？𠊎等㧯你等共樣，也係人！𠊎等來這位傳福音，係愛喊你等離開拜偶像這兜虛空个事，來信該創造天、地、海，㧯其中萬物个永生上帝。

16在過去个世代，佢由在萬民行自家个路；

17總係，佢一直行各樣个好事來證明自家个存在，就像：使風調雨順，五榖豐登，俾你等豐衣足食，心滿意足。」

18雖然使徒恁樣講，也險險無法度阻止眾人向佢等獻祭。

19該時，有兜猶太人對彼西底个安提阿㧯以哥念來到；佢等教唆眾人用石頭㧹保羅，恅到佢死掉，就將佢拖到城外去。

20該兜信徒圍等佢个時，無想到，佢又䟘起來，行轉城內去。第二日，佢同巴拿巴共下去特庇。

轉到敘利亞个安提阿

21 保羅㧯巴拿巴在特庇傳福音，使盡多人成做信徒。後來，佢等就轉頭，經過路司得㧯以哥念，去到彼西底个安提阿。

22佢等沿路堅固信徒个心，鼓勵佢等繼續信靠耶穌。佢等講：「愛入上帝个國，𠊎等一定愛經歷多多个苦難。」

23佢兩儕也為各教會設立長老，禁食祈禱後，將佢等交託給佢等所信靠个主。

24佢兩儕經過彼西底个地區，去到旁非利亞。

25佢等也在別加傳福音，以後就去亞大利，

26對該位坐船轉安提阿。當初，就係在這個所在，佢等被人交託在上帝个恩典中去工作；這個工作這下已經完成了。

27佢等轉到安提阿，就聚集教會个兄弟姊妹，對佢等報告，講起上帝樣般同佢等共下工作，上帝又樣般開門使外邦人相信。

28佢等在該位同信徒共下住好久。