啟示錄 21 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

新天新地

1接等，𠊎看到一個新天新地；因為先前个天㧯地已經過去，海也無掉了。

2𠊎又看到聖城，就係新个耶路撒冷，對天頂上帝該位降下來，像新娘打扮好勢來迎接姖个老公。

3𠊎聽到有大聲對寶座出來，講：

上帝个家在人間囉！

佢愛同人類共下住，

佢等愛做佢个子民。

上帝愛親自㧯佢等同在，

佢愛做佢等个上帝。

4佢愛拭掉佢等所有个目汁；

毋會再有死，也毋會再有傷心、大噭、㧯痛苦，

因為先前个事全部過掉了。

5這時，坐在寶座上个講：「看啊，𠊎換新萬物！」佢又講：「寫下來，因為這兜話係真實可靠个。」

6佢又對𠊎講：「完成了！𠊎係阿爾法㧯亞米茄，係開始㧯結束。𠊎愛將生命个泉水白白賜給嘴燥个人啉。

7得勝个人就做得承接這兜福氣：𠊎愛做佢个上帝，佢愛做𠊎个孻仔。

8總係該兜驚死、毋信、腐敗、㓾人、淫亂、行邪術、拜偶像、㧯講花撩个人，有該燒等硫磺个火湖等等佢等；這就係第二擺个死。」

新耶路撒冷

9該拿等七隻碗、裝滿背尾七種災難个七個天使，當中有一個來對𠊎講：「你來，𠊎愛帶你去看新娘，就係羔羊个𡜵娘。」

10聖靈感動𠊎；天使就帶𠊎到高山頂去，俾𠊎看到對天頂上帝該位降下來个聖城耶路撒冷。

11該座城充滿上帝个榮光，像碧玉㧯寶石恁樣皓光，像水晶恁明亮。

12城牆盡高大，有十二扇門，有十二個天使掌等；門个頂高寫等以色列十二支族个名。

13東片有三扇門，北片有三扇門，南片有三扇門，西片有三扇門。

14城牆有十二座地基，地基寫等羔羊十二使徒个名。

15該對𠊎講話个天使拿一節金仔做个尺去量該座城、城門，㧯城牆。

16城係四方个，長㧯闊共樣；天使用尺量該座城：長、闊、高全部共樣，有一萬兩千里。

17天使又量城牆，照人个尺寸來講，有一百四十四尺賁 。

18城牆係用碧玉起个，城本身係用純金做个，像淨浰个玻璃恁光。

19城牆个地基用各種个寶石來裝飾：第一座地基係碧玉，第二座係藍寶石，第三座係綠瑪瑙，第四座係綠寶石，

20第五座係紅瑪瑙，第六座係紅寶石，第七座係黃璧玉，第八座係水蒼玉，第九座係紅璧玉，第十座係翡翠，第十一座係紫玉，第十二座係紫晶。

21十二扇門係十二粒珍珠，逐扇門係用一粒珍珠做个。城內个街路係純金个，像係光光个玻璃。

22𠊎無看到城內有聖殿，因為全能个主上帝㧯羔羊就係這座城个聖殿。

23這座城毋使靠日頭抑係月光个照明；因為有上帝个榮光照等，又有羔羊做這城个燈。

24萬國全部愛通過這光來行；地上个王愛將佢等个榮華帶入這座城。

25城門歸日開開，永遠毋使關，因為在該位無暗晡頭。

26萬國會將佢等个榮光㧯尊貴帶入這座城。

27總係，一切無淨浰个，行為可惡抑係講花撩个，全部做毋得入去；只有該兜名寫在羔羊个生命冊底背个，正做得入去。