以賽亞書 27 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1到該日，上主愛用又硬又利个大劍刑罰大海怪，就係該彎彎斡斡善變个古蛇；佢愛㓾死大海中个惡龍 。

2到該日，上主愛提起佢所歡喜个葡萄園，講：

3「𠊎看守它，照時淹水；日夜看守，無人能破壞它。

4𠊎無愛再對𠊎个葡萄園發譴。若係園肚有竻仔㧯蒺藜，𠊎一定會挷掉，將它兜燒淨淨。

5若係𠊎子民个敵人愛𠊎保護，就愛先㧯𠊎和好。無毋著，佢等愛先㧯𠊎和好。」

6將來雅各个子孫會像樹仔恁樣釘根；以色列人民會發芽、開花，在全世界結滿果子。

7上主責罰以色列人，無像佢責罰佢等个敵人恁嚴。佢㓾掉个以色列人，也無像佢等个敵人被佢消滅恁多。

8上主用戰爭來對付佢个子民，將佢等逐走；佢對東方吹來一陣狂風，將佢等捲走 。

9除非雅各个子孫將佢等為外邦神明起个祭壇全部拆掉，將亞舍拉女神个柱仔㧯香壇全部㩳橫，佢等个罪絕對毋會得到赦免。

10堅固个城廢掉了，屋仔無人住，像曠野一樣；細牛仔在該位食草、歇睏，連樹个枝葉也食掉。

11樹枝全部枯燥拗斷，婦人家去拈來做柴燒。因為人民戇檔無智識，佢等个上帝無愛再憐憫佢等，佢等个創造主也無愛再施恩給佢等。

12 以色列民啊，到該日，上主愛對幼發拉底河到埃及邊界將你等一個一個召集起來，就像打榖个人收精榖共樣。

13到該日，歕羊角个聲會將流亡在亞述㧯埃及个以色列人全部喊轉來。佢等會在耶路撒冷 — 上主个聖山頂敬拜佢。