1 耶西个孻仔大衛个預言，就係上帝所重用个人發出个預言；雅各个上帝膏油設立佢做王。大衛為以色列做當多盡靚个詩歌。下背這首詩係大衛最後个遺言：
2上主个靈通過𠊎講話；
佢个信息常在𠊎嘴唇。
3 以色列个上帝識恁樣講，
以色列个磐石㧯𠊎講話：
該用正義來治理人民个，
用敬畏上帝來掌權个王，
4就像日頭打早一出來，
在無烏雲个天頂發光，
使落雨後个青草茂盛。
5上帝愛恁樣恩待𠊎个後代，
因為佢㧯𠊎有立永遠个約，
係永遠毋會廢掉个誓約，
佢一定會成全𠊎个願望，
佢會賜給𠊎一切个救恩。
6惡人就像㧒掉个竻仔，
麼人都毋敢用手拈它，
7愛拈它就用鐵棍鐵鉗；
定著將它用火燒淨淨。
大衛个勇士(歷代志上 11:10-41)8 大衛手下有名个勇士記在下背：第一個係他革捫人約設‧巴設；佢係「三勇士」个領袖。佢識在一擺戰爭中用槍 刺死八百人。
9「三勇士」个第二個係亞合族人朵多个孻仔以利亞撒。有一擺，佢㧯大衛向該兜前來攻打个非利士人罵陣。以色列人撤退；
10總係佢企在該位㧯非利士人拚命，直到佢个手痺到硬鉸掉，放毋開手中个劍。該日，上主使以色列人大贏。戰爭過後，以色列人轉到以利亞撒該位，相爭𢲾背搶敵人屍體个鐵甲。
11「三勇士」个第三個係哈拉人亞基个孻仔沙瑪。有一日，非利士人聚集在利希个豆仔田个時，以色列人全部逃走，
12總係沙瑪為到保護該垤田，就企在田肚抵抗佢等，㓾死盡多非利士人。該日，上主使以色列人大贏。
13收割个時，「三十勇士」當中有三儕下到亞杜蘭山窿該位去見大衛。該時，有一隊非利士人安營在利乏音山壢肚。
14該時大衛在一個有防衛个山頭；一群非利士人佔領伯利恆。
15大衛想念家鄉，就講：「𠊎當想愛啉伯利恆城門堘个井水啊！」
16該三個勇士就闖等過非利士人个營地，對該井肚打水，帶來給大衛。總係大衛毋肯啉，反轉將水倒出來獻給上主。
17佢講：「上主啊，𠊎樣般做得啉這水！這敢毋係啉冒生命危險去打水个勇士个血？」所以大衛毋啉。
這就係該三個勇士勇敢个行為。
18 洗璐雅个孻仔、約押个老弟亞比篩係「三十勇士」个領袖。佢識用槍刺死三百人，所以㧯「三勇士」共樣出名。
19佢係「三十勇士」當中最傑出个一個，成做佢等个領袖，總係比毋得「三勇士」个名聲。
20 甲薛人耶何耶大个孻仔比拿雅係另外一個出名个勇士。佢有當多勇敢个行為，包含㓾死兩個強壯个摩押戰士 。佢識在落雪天下到大窟肚打死一隻獅仔。
21佢又㓾死一個強壯个埃及人；該人拿等長槍，比拿雅只有拿等一支棍仔；比拿雅將佢手中个槍搶過來，用該槍將佢㓾死。
22這係耶何耶大个孻仔比拿雅勇敢个行為；佢㧯「三勇士」也盡出名。
23佢在「三十勇士」當中最受人尊重，總係㧯「三勇士」个名聲還係比毋得。大衛派佢做侍衛長。
24-39「三十勇士」其他个人有：
約押个老弟亞撒黑，
伯利恆人朵多个孻仔伊勒哈難，
哈律人沙瑪，
哈律人以利加，
帕勒提人希利斯，
提哥亞人益吉个孻仔以拉，
亞拿突人亞比以謝，
戶沙人米本乃，
亞合人撒門，
尼陀法人瑪哈萊，
尼陀法人巴拿个孻仔希立，
便雅憫族、基比亞人利拜个孻仔以太，
比拉頓人比拿雅，
迦實谷人希太，
亞拉巴人亞比‧亞本，
巴魯米人押斯瑪弗，
沙本人以利雅哈巴，
雅善該兜孻仔，
約拿單，
哈拉人沙瑪，
哈拉人沙拉个孻仔亞希暗，
瑪迦人亞哈拜个孻仔以利法列，
基羅人亞希多弗个孻仔以蓮，
迦密人希斯萊，
亞巴人帕萊，
瑣巴人拿單个孻仔以甲，
迦得人巴尼，
亞捫人洗勒，
比錄人拿哈萊 (佢係代洗璐雅个孻仔約押拿武器个人)，
以帖人以拉，
以帖人迦立，
赫人烏利亞，
總共係三十七儕。
Who We AreWhat We EelieveWhat We Do
2025 by iamachristian.org,Inc All rights reserved.
