詩篇 53 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

人个邪惡(詩篇 14) 大衛个教訓詩，交給聖歌隊長，用悲哀琴調。

1戇人心內講：

「無上帝！」

佢等盡腐敗，專門做可惡个事；

佢等無一儕行善。

2上帝對天頂看世間人，

愛看敢有明理个人，

有尋求上帝个人麼。

3總係，佢等全部行偏差，

攏總共樣腐敗。

佢等無人行善，

連一個乜無。

4上帝講：「做壞事个人樣般恁無智識？

佢等吞食𠊎个子民，就像食飯一樣；

佢等從來毋識求問𠊎。」

5總講，佢等會驚到愊愊掣，

經歷從來吂識有个著驚；

因為上帝愛打散佢子民仇敵个骸骨。

佢愛棄絕佢等，使佢等失望澇潰。

6願以色列个拯救對錫安出來！

上帝回復佢子民个產業該時，

雅各个子孫愛大歡喜，

以色列个人民愛快樂。