民數記 23 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 巴蘭對巴勒講：「你愛在這位為𠊎起七座祭壇，又為𠊎準備七隻牛牯㧯七隻羊牯。」

2 巴勒照佢吩咐去做；佢㧯巴蘭在逐座祭壇獻一隻牛牯㧯一隻羊牯。

3巴蘭對巴勒講：「你企在你个燒化祭堘頭；𠊎去看上主愛見𠊎麼。佢啟示𠊎麼介，𠊎一定㧯你講。」所以巴蘭單儕上到山頂。

4上帝向巴蘭顯現；巴蘭講：「𠊎已經起七座祭壇，在逐座祭壇獻一隻牛牯㧯一隻羊牯。」

5上主㧯巴蘭講應該講个話，然後喊佢倒轉巴勒該位去，將上主个話㧯巴勒講。

6巴蘭轉去，發現巴勒㧯所有摩押个領袖還企在燒化祭堘頭。

7巴蘭就講出以下个預言：

「摩押王巴勒帶𠊎出敘利亞，

帶𠊎出東片个山。

佢講：『來啊，為𠊎咒詛雅各；

來啊，為𠊎咒罵以色列。』

8上帝無咒詛个，𠊎樣做得咒詛？

上主無咒罵个，𠊎樣做得咒罵？

9𠊎對高山頂看佢等；

𠊎對山岡頂見佢等。

佢等係一個㧯萬民無共樣个國家；

佢等比別个國家還較蒙福。

10 雅各个子孫像泥沙恁樣；

以色列个後代多到無法度計算。

俾𠊎像上帝个子民恁樣結束一生；

𠊎願像義人恁樣平安過身。」

11 巴勒對巴蘭講：「你對𠊎做个係麼介？𠊎帶你到這位來咒詛𠊎个敵人，你反轉卻祝福佢等！」

12 巴蘭應講：「𠊎單淨做得講上主愛𠊎講个話！」

巴蘭第二擺預言

13 巴勒對巴蘭講：「你跈𠊎到另外一個地方去，對該位你只有看得到部份个以色列人。你愛在該位為𠊎咒詛佢等！」

14佢帶巴蘭到比斯迦山頂高个瑣腓田，在該位也起七座祭壇，在逐座祭壇獻一隻牛牯㧯一隻羊牯。

15 巴蘭對巴勒講：「你企在你个燒化祭堘頭，𠊎到該片去見上帝。」

16上主向巴蘭顯現，㧯佢講應該講个話，然後喊佢倒轉巴勒該位去，將上主个話㧯巴勒講。

17巴蘭轉去，發現巴勒㧯摩押該兜領袖還企在燒化祭堘頭。巴勒問佢上主講麼介話，

18巴蘭就講出以下个預言：

「來啊，西撥个孻仔巴勒；

你來聽𠊎愛講个話。

19上帝㧯人無共樣，佢毋講花撩；

佢毋像普通人，佢毋會改變主意。

佢答應个事，一定做到；

佢一講話，事就完成。

20𠊎奉主命令來祝福；

上帝賜个恩典，𠊎無法度收轉來。

21𠊎看出雅各个將來，

以色列無災難，也無災禍。

上主 — 佢等个上帝㧯佢等同在；

佢等歡喜慶祝上主做佢等个王。

22上帝𢱋佢等出埃及；

佢打退埃及，就像野牛恁有力。

23法術無法度害雅各；

卜卦也無辦法害以色列。

這下，人愛談論雅各，

就係談論以色列，講：

『看哪，上帝成就偉大个事！』

24 以色列人像母獅企起來，

就像公獅䟘起來尋食；

牠若無食掉獵物个肉，

無啉到獵物个血，牠絕對毋肯停。」

25 巴勒對巴蘭講：「你毋咒詛以色列人，至少也毋應該祝福佢等啊！」

26 巴蘭應講：「𠊎毋係有㧯你講過，𠊎一定愛照上主所講个話做！」

巴蘭第三擺預言

27 巴勒對巴蘭講：「跈𠊎來！𠊎愛帶你到另外一個地方；有可能上帝會俾你在該位為𠊎咒詛佢等。」

28巴勒就帶巴蘭到該遠遠看得到曠野个批珥山頂高。

29巴蘭對巴勒講：「你愛在這位為𠊎起七座祭壇，又為𠊎準備七隻牛牯㧯七隻羊牯。」

30巴勒照巴蘭个話去做，在逐座祭壇獻一隻牛牯㧯一隻羊牯。