阿摩司書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

有關摩押

1上主講：「摩押人再三犯罪，𠊎一定愛責罰佢等。佢等將以東國王个屍骨燒做灰。

2所以𠊎愛放火燒摩押，將加略个王宮燒掉。軍隊大聲喊、羊角聲盡響个時，摩押人一定會在戰場死掉。

3𠊎愛除滅摩押个領袖，㓾掉它所有个官長。」上主恁樣宣佈了。

有關猶大

4上主恁樣講：「猶大人再三犯罪，𠊎一定愛責罰佢等。佢等拒絕𠊎个教訓，毋遵守𠊎个誡命。佢等被祖先所信个假神引誘，離開正道。

5所以𠊎愛放火燒猶大，將耶路撒冷个王宮燒掉。」

上帝愛審判以色列

6上主恁樣講：「以色列人再三犯罪，𠊎一定愛責罰佢等。佢等為到錢銀將義人賣掉，為到一雙草鞋將窮人賣掉 。

7佢等將窮苦人个頭那踏到泥塥肚，將路項求幫助个人㩳開。甚至兩子爺㧯共一個使女 行姦淫，侮辱𠊎个聖名。

8佢等在逐祭壇堘，睡在窮苦人抵押給佢等个衫褲面頂；佢等還在神廟肚，食人受罰拿來个酒。

9「𠊎个子民啊，亞摩利人雖然像香柏樹恁高大、像橡樹恁強壯，為到你等𠊎還係將佢等連根㧯果子徹底消滅了。

10𠊎對埃及將你等𢱋出來，在曠野帶領你等四十年，將亞摩利人个土地賜給你等。

11𠊎對你等个子弟當中揀選先知，對你等个青年當中培養離俗人 。以色列人啊，𠊎 — 上主講這兜話，敢講毋著嗎？

12總係你等勉強離俗人啉酒，毋准先知傳𠊎个話。

13看啊，𠊎愛將你等壓到橫在地上，像載忒多五榖个車仔磧到落下去。

14就算係走相逐个選手也走毋掣；大力士也會失去力量；軍人連自家个性命也難保。

15弓箭手个腳企毋在；走盡遽个戰士也走毋掣；騎馬个也救毋到自家个命。

16在該日，連最勇敢个戰士也會脫掉戰袍來逃命。」上主恁樣宣佈了。