民數記 7 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

各族長奉獻祭物

1 摩西搭好聖帳篷該日，佢用聖油膏聖帳篷㧯底背肚所有个用器、祭壇，㧯祭壇頂所有个用品，使它兜分別為聖。

2以色列各支族个領袖，就係各族族長，係管理人口登記个人，

3帶佢等个禮物來，獻給上主：有六輛篷布車，十二隻牛牯。每兩個領袖獻一輛篷布車，每一個領袖獻一隻牛牯。

佢等將這兜東西獻在聖帳篷前以後，

4上主對摩西講：

5「你愛收下這兜禮物做聖帳篷个用途，照利未人工作个需要分給佢等。」

6所以摩西將篷布車㧯牛牯交給利未人。

7佢將兩輛車，四隻牛，照革順子孫工作个需要交給佢等，

8又將四輛車，八隻牛，照米拉利子孫工作个需要交給佢等。佢等全部愛在祭司亞倫个孻仔以他瑪个指揮下背執行任務。

9總係摩西無將車抑係牛交給哥轄个子孫，因為佢等負責用肩頭扛聖物。

10各領袖也帶來慶祝獻壇典禮个禮物。當佢等預備好將禮物獻在祭壇頂个時，

11上主對摩西講：「你愛㧯佢等講，在十二日當中，逐日愛有一個領袖為獻壇典禮獻禮物。」

12-83佢等照以下个順序獻佢等个禮物。

第一日，獻禮物个係猶大支族个領袖亞米拿達个孻仔拿順。

第二日，獻禮物个係以薩迦支族个領袖蘇押个孻仔拿坦業。

第三日，獻禮物个係西布倫支族个領袖希倫个孻仔以利押。

第四日，獻禮物个係呂便支族个領袖示丟珥个孻仔以利蓿。

第五日，獻禮物个係西緬支族个領袖蘇利沙代个孻仔示路蜜。

第六日，獻禮物个係迦得支族个領袖丟珥个孻仔以利雅薩。

第七日，獻禮物个係以法蓮支族个領袖亞米忽个孻仔以利沙瑪。

第八日，獻禮物个係瑪拿西支族个領袖比大蓿个孻仔迦瑪列。

第九日，獻禮物个係便雅憫支族个領袖基多尼个孻仔亞比但。

第十日，獻禮物个係但支族个領袖亞米沙代个孻仔亞希以謝。

第十一日，獻禮物个係亞設支族个領袖俄蘭个孻仔帕結。

第十二日，獻禮物个係拿弗他利支族个領袖以南个孻仔亞希拉。

逐個領袖所獻个禮物完全共樣：

一隻銀盤，重一點五公斤，㧯一隻銀碗，重八百公克，全部照聖所个標準，底背裝滿攪油个幼麵粉做素祭；

一個金碟仔，重一百一十公克，裝等香；

一隻細牛牯，一隻綿羊牯，一隻一歲大个細羊牯做燒化祭；

一隻山羊牯做贖罪祭；

兩隻牛牯，五隻綿羊牯，五隻山羊牯，五隻一歲大个細羊牯做平安祭。

84-88十二個領袖為獻壇典禮所獻个禮物總數係：

十二個銀盤㧯十二隻銀碗，總共重二十七點六公斤；

十二個金碟仔，總共重一點三二公斤，全部裝滿香；

十二隻細牛牯、十二隻綿羊牯、十二隻一歲大个細羊牯、㧯共下獻个素祭做燒化祭；

十二隻山羊牯做贖罪祭；

二十四隻牛牯、六十隻綿羊牯、六十隻山羊牯、六十隻一歲大个細羊牯做平安祭。

89 摩西進入聖帳篷，愛對上主講話个時，佢聽到上主對約櫃贖罪个蓋仔頂，兩個基路伯中間，對佢講話。