民數記 12 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

美莉安被上主責罰

1 摩西識討一個古實

个細妹仔做𡜵娘；美莉安㧯亞倫為這件事批評摩西。

2佢等講：「敢講上主單單通過摩西講話？敢毋係也通過𠊎等講話？」這話上主聽到了。

3摩西係一個謙卑个人；佢比世間所有个人還較謙卑。

4上主忽然對摩西、亞倫㧯美莉安講：「你三儕到𠊎聖帳篷這位來。」佢三儕就去了。

5上主在雲柱中降臨，企在聖帳篷門口，喊講：「亞倫！美莉安！」佢兩儕就企出來。

6上主講：「你等聽𠊎講！

你等當中有先知个時，

𠊎 — 上主在異象中向佢啟示𠊎自家，

在夢中對佢講話。

7總係𠊎个僕人摩西毋係恁樣；

𠊎派佢管理𠊎所有个子民 。

8所以𠊎㧯佢面對面講話，

清清楚楚，毋使用鈴仔。

佢甚至看𠊎 — 上主个形像！

你等樣般恁大膽批評𠊎个僕人摩西呢？」

9上主向佢等發譴，就離開佢等。

10雲對聖帳篷頂高徙開个時，美莉安个皮膚忽然發癩像雪恁白。亞倫看到美莉安發癩，

11就對摩西講：「大人啊，求你毋好俾𠊎等因為戇檔犯罪來受到這個責罰。

12毋好俾美莉安像一出母胎就糜掉一半个死胎。」

13 摩西就向上主祈求講：「上帝啊，求你醫治姖！」

14上主應摩西講：「若係厥爸呸口潾在姖个面，姖也應該忍受七日个見笑。這下，愛將姖關在營外七日，然後正做得帶姖轉來。」

15所以，美莉安被人關在營外七日；人民等姖轉來後正徙營。

16佢等離開哈洗錄，來到巴蘭曠野安營。