申命記 26 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

奉獻新出个土產

1「你等入去佔領上主 — 你等个上帝愛賜給你等个土地、在該位定居後，

2愛對該土地將新出个各種土產放兜在籃仔肚，帶到上主 — 你等个上帝所選愛設立佢个名个所在。

3你等愛去見輪班做祭司个，對佢講：『𠊎今晡日向上主 — 你个上帝表明，𠊎已經入到上主向𠊎等祖先應許愛賜給𠊎等个土地。』

4「祭司愛將你等帶去个籃仔收下來，放在上主 — 你等上帝个祭壇前。

5你等在上主 — 你等上帝面前愛照恁樣講：『𠊎个祖先係一個流浪个亞蘭人。佢帶家族到埃及暫時住。佢等去个時人數盡少，以後漸漸增多，成做強大个民族。

6埃及人欺負𠊎等，強迫𠊎等做奴才，做苦工。

7𠊎等就求喊上主 — 𠊎等祖先个上帝；佢看到𠊎等个痛苦、艱難、受迫害，就垂聽𠊎等个哀求。

8上主用自家个大能大力行神蹟奇事，又使得人驚个事發生，來救𠊎等離開埃及。

9佢𢱋𠊎等到這位，將這垤流乳㧯蜜、盡肥个土地賜給𠊎等。

10所以，上主啊，𠊎這下將你所賜給𠊎土地上新出个土產帶來獻給你。』

「你等講這兜話以後，愛將籃仔放在上主 — 你等个上帝面前，在該位敬拜佢。

11你等愛為上主 — 你等个上帝賜給你等个豐收歡喜快樂，也愛邀請利未人㧯住在你等當中个外族人共下歡喜快樂。

12「你等每第三年，就係獻十分之一該年，愛將你等土產收成个十分之一分給利未人、外族人、孤兒㧯寡婦，俾佢等在你等个城中攏總有好食到飽。

13然後，你等愛向上主 — 你等个上帝講：『𠊎無將神聖个十分之一留在屋下；𠊎已經照你个命令，將它分給利未人、外族人、孤兒㧯寡婦。𠊎無違背抑係毋記得獻十分之一个條例。

14屋下做喪事个時，𠊎無食這聖物；在禮儀上無淨浰个時，𠊎也無將它拿出屋外；𠊎也無拿它做祭物來獻給死掉个人 。上主 — 𠊎个上帝啊，𠊎聽從你，遵守你有關獻十分之一个一切條例。

15求你對天頂 — 你个聖所看顧𠊎等，賜福給你个子民以色列。求你照你向𠊎等祖先所應許个，降福給你所賜𠊎等這垤流乳㧯蜜、盡肥个土地。』」

上主聖潔个子民

16「今晡日，上主 — 你等个上帝命令你等遵行佢所有个法律誡命；所以你等愛一心一意確實遵行。

17今晡日，你等承認上主做你等个上帝，也答應愛遵行佢个道，遵守佢个法律、誡命㧯例規，聽從佢个話。

18今晡日，上主也照佢个應許承認你等做佢自家寶貝个子民，命令你等遵行佢所有个誡命。

19佢愛使你等比佢所造个任何國家較強大，使你等个名受頌讚，受尊敬。你等愛照佢个應許成做上主 — 你等上帝聖潔个子民。」