1 羅波安到示劍去；以色列人全部聚集在該位，愛設立佢做王。
2尼八个孻仔耶羅波安因為閃所羅門王逃到埃及去；佢一聽到羅波安做王个消息，就對埃及趕轉來 。
3北部支族个人民派人去請佢來，然後㧯佢共下去見羅波安，對佢講：
4「若爸所羅門使𠊎等揹重擔。若係你減輕𠊎等个負擔，俾𠊎等个生活過得去，𠊎等就服事你。」
5 羅波安講：「三日以後再過來，𠊎會回答你等。」所以佢等就離開。
6 羅波安王問幾個元老个意見；佢等識做過厥爸所羅門王个顧問。佢問佢等：「你等想𠊎應該樣般回答這兜人呢？」
7佢等講：「若係你想愛好好為人民服務，回答佢等个時愛講好話，佢等就會永遠做你个奴僕。」
8總係，羅波安毋搭這兜元老个勸話，反轉去尋該兜㧯佢共下大个後生人；佢等這下做佢个顧問。
9羅波安問佢等：「你等有麼介建議？該兜人民要求𠊎減輕佢等个負擔，𠊎應該樣般回答佢等呢？」
10佢等講：「你做得恁樣㧯佢等講：『𠊎个手指尾比吾爸个腰身還較粗！
11吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！』」
12三日以後，耶羅波安㧯所有人民照羅波安王个指示，又到佢面前。
13-14王毋聽元老个建議，反轉照後生人个建議對人民講當嚴个話。佢講：「吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！」
15王毋搭人民个要求；總係這係上主个旨意，愛實現佢通過示羅人先知亞希雅對尼八个孻仔耶羅波安所講个話。
16 以色列人民看到王毋接納佢等个要求就大聲喊講：
「在大衛家𠊎等算麼介？
耶西个孻仔對𠊎等有麼介好處？
以色列人啊，𠊎等來去轉！
大衛家啊，自家保重噢！」
所以，以色列人民造反，轉屋下去。
17總係住在猶大地區个以色列人，羅波安還係做佢等个王。
18 羅波安王派苦工个總管亞多蘭到以色列人該位去，以色列人卻用石頭將佢㧹死。這時，羅波安王趕緊上戰車，瀉轉去耶路撒冷。
19對恁樣，北國以色列个人民一直反大衛个家族。
20 以色列人民聽講耶羅波安對埃及轉來了，就請佢去赴一個民眾大會，設立佢做以色列王。只有猶大一支族還係對大衛个後代盡忠心。
示瑪雅个預言(歷代志下 11:1-4)21 羅波安一到耶路撒冷就召集猶大㧯便雅憫支族最優秀个軍隊十八萬人，愛去攻打以色列，搶轉佢 — 所羅門个孻仔對北部支族个控制。
22總係上帝㧯神人示瑪雅講：
23「你去對所羅門个孻仔猶大王羅波安㧯所有猶大、便雅憫支族，並其他个人民講：
24『上主恁樣講：毋好去攻打你等个兄弟以色列人。你等全部轉去！這擺所發生个事係出於𠊎。』」佢等就聽從上主个命令，全部轉屋下去。
耶羅波安鑄造兩隻金牛25 以色列王耶羅波安在以法蓮山區个示劍起防備工事，住在該位一站時間。後來，佢離開該城，又在比努伊勒起防備工事。
26-27耶羅波安心肚想：「照目前个情形看，若係𠊎个人民上耶路撒冷去，在該位个聖殿向上主獻祭，佢等會變心去對猶大王羅波安盡忠，又會來㓾𠊎。恁樣，𠊎个國會歸大衛个後代。」
28 耶羅波安王參詳過，就決定鑄造兩隻金牛，然後對人民講：「你等去耶路撒冷敬拜忒辛苦了。以色列人民啊，這就係𢱋你等出埃及个神明！」
29耶羅波安將一隻金牛放在伯特利，另外一隻放在但。
30這就成做人民犯罪个原因，因為佢等到伯特利㧯但
去拜金牛。31耶羅波安又在山岡頂起祭拜个神廟，甚至對利未支族以外个人選出祭司。
32 耶羅波安又定八月十五做宗教節期，像在猶大个節期共樣。佢在伯特利祭壇頂向佢鑄造个金牛獻祭，又在伯特利選立祭司，愛佢等在佢所起个神廟事奉。
33耶羅波安在八月十五，就係佢自家為以色列人民選定个節期，去伯特利，在祭壇頂燒香。
Who We AreWhat We EelieveWhat We Do
2025 by iamachristian.org,Inc All rights reserved.
