申命記 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1「若係你等當中有做先知抑係解夢个人，用神蹟奇事拐騙你等，

2喊你等去拜從來毋識拜過个神明，就算佢講个神蹟奇事實現了，

3你等也毋好搭佢；因為上主 — 你等个上帝用佢來考驗你等，愛知你等係毋係一心一意敬愛上主 — 你等个上帝。

4你等愛順從上主 — 你等个上帝，敬畏佢；你等愛聽從佢，遵行佢个誡命；你等愛事奉佢，專心靠佢。

5該先知抑係解夢个人，你等一定愛處死佢；因為佢煽動你等悖逆上主 — 你等个上帝，就係𢱋你等出埃及、救你等離開做奴才之地个上主。這種人係邪惡个；佢想愛拐騙你等偏離上主 — 你等个上帝所指示个道路。你等一定愛處死佢，對你等當中除掉這種邪惡个事。

6「連你等个兄弟、子女、所惜个𡜵娘，抑係盡親近个朋友，也可能會偷偷仔來煽動你等去拜你等㧯你等祖先從來毋識拜過个神明。

7佢等當中，可能有人會拐騙你等去拜附近抑係遠方个人所拜个神明。

8總係你等做毋得聽從佢，做毋得信服佢。你等毋使憐憫這種人，也毋好保護佢。

9一定愛除掉佢！你等自家愛先出手用石頭㧹佢，來俾別人跈。

10愛用石頭㧹死佢，因為佢想愛拐騙你等離開上主 — 你等个上帝，就係𢱋你等出埃及、救你等離開做奴才之地个上主。

11恁樣，以色列人全部聽到這件事正會驚，你等當中就毋會再有人敢做這種邪惡个事。

12-13「若係你等聽人講，在上主 — 你等个上帝賜給你等住个一個城肚有壞人出現，拐騙城肚个人去拜你等從來毋識拜過个神明，

14你等愛徹底打探、調查。若係證明這種邪惡个事確實發生過，

15你等就愛用刀劍消滅城肚所有个人民㧯頭牲，將該城完全毀滅。

16你等愛將城肚所有个戰利品集在廣場上，然後放火將城㧯城肚所有財物全部燒掉，做祭物獻給上主 — 你等个上帝。該城愛永遠變荒埔，做毋得重建。

17-18所有應該燒掉个東西，你等做毋得保留。恁樣，上主就毋會再發譴。若係你等遵行𠊎今晡日所頒佈个、上主 — 你等上帝一切个誡命，實行佢所歡喜个事，佢就會憐憫你等，用慈愛款待你等，照佢對你等祖先个應許，使你等人口增加。」