1 所羅門王係全以色列个王；
2厥官員个名記在下背：
大祭司：撒督个孻仔亞撒利雅。
3王室書記：示沙个孻仔以利何烈㧯亞希亞。
歷史官：亞希律个孻仔約沙法。
4元帥：耶何耶大个孻仔比拿雅。
祭司：撒督㧯亞比亞他。
5總督長：拿單个孻仔亞撒利雅。
王室顧問：拿單个孻仔祭司撒布得。
6王宮僕人總管：亞希煞。
苦工个總管：亞比大个孻仔亞多尼蘭。
7 所羅門設立十二個人在以色列逐所在做地區總督。佢等一定愛對所管个地區供給食物給王㧯王个家族；逐區總督逐年負責一隻月。
8這十二地區个總督㧯佢等个管區記在下背：
便‧戶珥：管區係以法蓮山區。
9 便‧底甲：管區係瑪加斯、沙賓、伯‧示麥、以倫‧伯‧哈蘭這兜城。
10 便‧希悉：管區係亞魯泊㧯梭哥兩城，並全部希弗地區。
11討所羅門妹仔她法做𡜵娘个便‧亞比拿達：管區係多珥全地。
12 亞希律个孻仔巴拿：管區係他納、米吉多兩城，㧯偎近伯‧善、撒拉旦、耶斯列南片个全部地區，直到亞伯‧米何拉城㧯約念城。
13 便‧基別：管區係基列个拉末城，㧯在基列屬瑪拿西子孫睚珥宗族个村莊，㧯巴珊个亞珥歌伯地區，共六十個大鎮，全部有城牆㧯銅門閂。
14 易多个孻仔亞希拿達：管區係瑪哈念地區。
15討所羅門另外一個妹仔芭實抹做𡜵娘个亞希瑪斯：管區係拿弗他利地區。
16 戶篩个孻仔巴拿：管區係亞設㧯比亞錄鎮。
17 帕路亞个孻仔約沙法：管區係以薩迦地區。
18 以拉个孻仔示每：管區係便雅憫地區。
19 烏利个孻仔基別：管區係基列地區，就係以前亞摩利王西宏㧯巴珊王噩管个所在。
除了這十二個地區總督以外，有一個總督長總管全部地區。
所羅門个強盛20 猶大㧯以色列个人民像海滣个沙恁多。佢等有食有啉，非常快樂。
21所羅門管理个國家包含對幼發拉底河到非利士㧯埃及邊界所有个國家。所羅門在世个日仔，佢等向佢進貢，歸順佢。
22 所羅門逐日需要五千公升幼麵粉，一萬公升粗麵粉，
23十隻牛欄肚畜个肥牛，二十隻牧場畜个肥牛，一百隻綿羊；另外還有鹿仔、羚羊、黃斑鹿㧯屋下畜个雞仔。
24 所羅門統治幼發拉底河西片所有个土地，對幼發拉底个提弗薩直到最西片个迦薩城。所有幼發拉底河西片个國王全部歸順佢；佢也㧯鄰國和平相處。
25所羅門在世个時，全猶大㧯以色列个人民全部過太平个日仔，對最北片个但到最南片个別是巴逐家庭全部有自家个葡萄樹㧯無花果樹。
26 所羅門个馬寮肚有四萬隻拖戰車个馬㧯一萬兩千隻騎兵个馬。
27該十二個地區个總督逐個月照輪負責供給所羅門王㧯王宮肚所需要个食物，從來毋識缺少。
28逐地區个總督也供給份內應該繳个大麥㧯燥草給需要个地方，來畜戰馬㧯其他个馬。
29上帝賜給所羅門盡大个智慧、盡強个理解力、又有像海恁闊个心胸。
30所羅門个智慧超過東方人㧯埃及人个智慧。
31佢比萬人較有智慧，贏過以斯拉人以探，又贏過瑪曷个孻仔希幔、甲各、達大。佢个名聲傳到周圍各國。
32佢做三千句箴言㧯一千零五首詩歌。
33佢講論樹木花草，對黎巴嫩个香柏樹到生在牆頂个牛膝草，又講論逐種飛禽、走獸、爬蟲㧯魚類。
34世界逐國个王全部聽到所羅門个智慧，就派人去聽佢智慧个話。
Who We AreWhat We EelieveWhat We Do
2025 by iamachristian.org,Inc All rights reserved.
