1接等，拿瑪人瑣法應約伯講：
2你使𠊎心肝煩躁，
𠊎忍毋住了，一定愛應你。
3你責備𠊎个話實在當侮辱人，
總係𠊎有靈性知樣般來應你。
4你敢毋知，自古以來，
有人類在地上開始，
5壞人个歡喜全部係暫時个，
無虔誠个人快樂也擋毋久。
6就算佢自高，高到會堵天，
佢个頭那擎到會揬到雲，
7佢到尾會像糞土恁樣被人掃掉；
識佢个人全部會問，佢走㖠去了。
8佢像夢恁樣消失，永遠毋會再看到；
佢像暗晡頭个異象，一下仔就無掉。
9看過佢个人毋會再看到佢；
佢愛對佢所住个所在消失。
10佢个子女苦到愛去向窮苦人求情；
佢愛親手將剝削得來个財物還人。
11佢雖然還當後生紮磳，
總係無幾久會成做泥。
12佢恅到邪惡盡甘甜，
將它囥在舌乸底下，
13啣在嘴孔肚，
嘗它个味道；
14總係食物在肚笥變酸，
變到像毒蛇个汁恁毒。
15壞人吞食个財富還會嘔出來；
上帝愛對佢肚笥底背撈出來。
16壞人啜毒蛇个毒汁；
毒蛇个舌乸毒死佢。
17佢無命好看到橄欖油像河壩水流等下，
也看毋到乳㧯蜂糖像溪水流出來。
18佢愛放掉勞苦得來、吂欣賞个一切；
佢無機會好享受佢所得到个財富，
19因為佢壓迫、拒絕窮苦人，
又霸佔別人所起个屋舍。
20因為佢盡貪心，永遠毋知好滿足，
佢合意个東西連一項也無法保留。
21佢食淨淨，麼介都無留下，
所以佢个幸福毋會長久。
22在佢最滿足成就个時，
一切个災禍會接等來。
23由在佢盡食个時節，
上帝愛向佢大發譴，
像風差恁樣攻擊佢。
24佢愛閃開鐵劍个時，
卻被銅箭將佢射穿。
25佢將箭對背後一抽，
皓光箭頭對膽中出；
佢就驚到面色癧青。
26佢个財寶全部消滅淨淨；
並毋係人个手所點个火，
將佢全家㧯財產燒光光。
27天愛顯明佢个罪；
地愛做證攻擊佢。
28上帝大發譴个時節，
佢个家業會損淨淨。
29這係壞人對上帝所得个結局，
就係上帝為佢所決定个報應。
Who We AreWhat We EelieveWhat We Do
2025 by iamachristian.org,Inc All rights reserved.
