列王紀上 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

所羅門準備起聖殿(歷代志下 2:1-18)

1 泰爾王希蘭一溜裡係大衛个朋友；佢一聽到所羅門承接厥爸大衛做王，就派人來見所羅門。

2所羅門派人去㧯希蘭講：

3「你知吾爸大衛無法度為上主 — 佢个上帝起聖殿，因為佢一直㧯周圍个國家相㓾。佢愛等到上主使佢贏過所有个仇敵以後正做得起聖殿。

4這下，上主 — 𠊎个上帝已經使𠊎个天下太平，無仇敵，乜無災禍。

5上主識應許吾爸大衛講：『𠊎愛該承接你王位个孻仔為𠊎个名起聖殿。』所以，𠊎決定愛起聖殿，來敬拜上主 — 𠊎个上帝。

6請你派你个工人到黎巴嫩為𠊎斬香柏樹。𠊎這片个工人會㧯佢等共下工作；𠊎也會照你所定个工錢給你个工人。你知，𠊎等毋像你等西頓人恁會斬樹仔。」

7 希蘭聽到所羅門个話，非常歡喜；佢講：「願上主今晡日得到頌讚！佢賜給大衛一個有智慧个孻仔治理這偉大个民族！」

8所以希蘭回答所羅門：「𠊎已經接到你傳來个話；𠊎準備照你个要求供應香柏樹㧯松樹。

9𠊎个工人會對黎巴嫩將樹料運到海肚，捆做木排，漂到你指定个所在。𠊎个工人會在該位拆開木排，交給你个工人處理。另外，𠊎希望你供應食物給𠊎个家族。」

10恁樣，希蘭照所羅門个要求供給香柏樹㧯松樹；

11所羅門逐年給希蘭兩千公噸麥仔㧯四十萬公升 純橄欖油，做佢家族个食物。

12上主照佢个應許，賜給所羅門智慧。希蘭㧯所羅門和平相處，彼此立約。

13 所羅門王對全以色列擇三萬人做苦工，

14派亞多尼蘭管理佢等。佢將佢等分做三隊，逐隊一萬人。逐隊在黎巴嫩一隻月，在屋下兩隻月。

15所羅門也派八萬儕在山頂鑿石頭，七萬儕搬運石頭，

16又有三千三百個工頭來監督佢等工作。

17佢等照所羅門王个命令鑿貴重个大石頭，做聖殿个地基石。

18所羅門㧯希蘭个建築工人，還有對迦巴勒城來个人鑿石頭，準備石頭㧯樹料起聖殿。