出埃及記 38 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

造祭壇(出埃及記 27:1-8)

1佢用金合歡木造燒化祭个祭壇。壇係四方个，長兩公尺兩公寸，闊兩公尺兩公寸，高一公尺三公寸。

2佢在壇个四角頂造突出來个角，㧯壇連做歸垤，並用銅將壇包等。

3佢為祭壇造所需要个一切用品：火灰盤、鏟仔、碗、肉叉㧯火鼎；這兜用品全部係用銅鑄造个。

4佢為祭壇造一隻銅網，安在祭壇个周圍下半節，對壇底透到壇个一半恁高。

5佢又造四隻用來扛个銅圈仔，安在壇个四角；

6又用金合歡木造祭壇个槓仔，用銅包等，

7穿過壇兩片个圈仔。壇係用枋仔造个，中央係空殼个。

造銅盆(出埃及記 30:18)

8佢造一個洗盪用个銅盆㧯一個盆座，係用該兜在聖帳篷門口事奉个該兜婦女所用个鏡仔造个。

造聖帳篷个庭院(出埃及記 27:9-19)

9佢用麻紗刺个帳幔為聖帳篷做圍欄，圍一隻庭院。南片个帳幔長四十四公尺，

10用二十支有座个銅柱架起來，柱仔頂个鉤仔㧯橫杠係用銀造个。

11北片个帳幔也係恁樣，長四十四公尺，用二十支有座个銅柱架起來，柱仔頂个鉤仔㧯橫杠係用銀造个。

12西片个帳幔長二十二公尺，用十支有座个柱仔架起來，柱仔頂个鉤仔㧯橫杠係銀造个。

13在東片，庭院个門口，帳幔也係二十二公尺闊。

14門口个兩片全部有六公尺六公寸闊个帳幔，

15用三支有座个柱仔架起來。

16庭院周圍所有个帳幔係用麻紗做个。

17柱仔个座係銅造个；鉤仔、橫杠、㧯柱仔頂高全部用銀包等。庭院四圍个柱仔全部用銀个橫杠連等。

18庭院門口个門簾係用麻紗㧯藍色、紫色、深紅色个肨線，用繡花个手工刺个，闊九公尺，高兩公尺，㧯庭院个帳幔平高，

19用四支有銅座个柱仔架起來。柱仔頂个鉤仔㧯橫杠係用銀造个，柱仔頂用銀包等。

20聖帳篷㧯圍庭院所用个釘仔全部係用銅造个。

聖帳篷所用个金器

21聖帳篷 (就係放約櫃个聖所) 所用个金器總數列在下背。這份清單係遵照摩西个命令、祭司亞倫个孻仔以他瑪指揮利未人所準備个。

22(上主所命令摩西个事，全部係猶大支族戶珥个孫仔、烏利个孻仔比撒列做个。

23佢个助手但族人亞希撒抹个孻仔亞何利亞伯係一位雕刻个師傅㧯設計師，也會用藍色、紫色、㧯深紅色个肨線㧯麻紗來繡花。)

24為到聖所个工程奉獻給上主个金仔，照聖所个標準來秤，總共一千公斤。

25對登記戶口个人所收到个銀仔，照聖所个標準來秤，總共三千四百三十公斤。

26這數目係照戶口登記个、逐儕照聖所个標準來秤所繳納个銀仔个總數。登記个人數二十歲以上个，總共六十萬三千五百五十人。

27佢等用三千四百公斤个銀仔造聖帳篷㧯帳幔个一百隻銀座，逐隻重三十四公斤。

28賸到个三十公斤銀仔，比撒列拿來包柱仔个橫杠、鉤仔、㧯柱仔頂。

29獻給上主个銅總共兩千四百二十五公斤。

30佢用這銅來造聖帳篷門口个座、銅壇、壇个銅網，壇攏總个用品、

31庭院周圍㧯庭院門口个座，還有聖帳篷㧯庭院周圍所用个一切釘仔。