以斯帖記 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

以斯帖為王㧯哈曼辦筵席

1在以斯帖禁食个第三日，姖著王后个禮服入王宮，企在王宮个內院，面向王个大殿。王坐在寶座頂，面向殿門。

2王看到王后以斯帖企在外背，就滿心歡喜，伸出金杖。以斯帖就向前去摸杖頭。

3王問姖：「王后以斯帖啊，有麼介事係麼？你愛求麼介，𠊎全部會給你。就係𠊎王國个一半，𠊎也肯賜給你。」

4 以斯帖應講：「國王若歡喜，就請王㧯哈曼今暗晡來參加𠊎特別準備个筵席。」

5王吩咐人喊哈曼遽遽來，共下去參加以斯帖个筵席。所以王㧯哈曼共下去。

6啉酒个時，王又問以斯帖：「你愛求麼介，𠊎全部會給你。就係王國个一半，𠊎也肯賜給你。」

7 以斯帖講：

8「若係𠊎得到國王个愛惜，准𠊎要求，請王㧯哈曼天光日再來參加𠊎特別準備个筵席。該時，𠊎正㧯王講𠊎有麼介請求。」

哈曼陰謀愛㓾末底改

9 哈曼心情當快樂，歡頭喜面離開筵席。總係佢經過王宮門口个時，看到末底改坐在該位毋企起來，全無一些仔尊敬，就閼末底改到火當𤏸。

10總係哈曼還係忍等自家个怒氣，轉到屋下，然後請朋友到厥屋下，也喊厥𡜵娘細利斯出來。

11哈曼向佢等展自家个好額㧯盡多个子女，又講王樣般提升看重佢，使佢超過所有个大臣㧯官員。

12哈曼又講：「毋單淨恁樣，王后以斯帖還特別為王㧯𠊎一儕準備筵席，又請𠊎㧯王天光日再去呢！

13總係，逐擺𠊎看到該隻猶太人末底改坐在王宮門口，𠊎就感覺這所有个榮華富貴對𠊎全無麼介意思。」

14佢个𡜵娘細利斯㧯所有个朋友向佢建議講：「你做得搭一座二十二公尺高个絞刑架！天光朝晨，你要求王將末底改吊在頂高。恁樣你就會快快樂樂㧯王共下去坐桌了。」

哈曼認為這係當好个主意，就喊人搭絞刑架。