撒母耳記上 11 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

掃羅打贏亞捫人

1 亞捫人个王拿轄攻打基列地區个雅比城；佢个軍隊包圍全城。雅比人全部對拿轄講：「你㧯𠊎等立約，𠊎等就服事你。」

2 亞捫人拿轄講：「愛𠊎㧯你等立約？做得！有一個條件：𠊎愛將你等逐儕人个右眼挖出來，用恁樣來侮辱所有个以色列人。」

3 雅比該兜長老對佢講：「請寬容𠊎等七日，俾𠊎等派使者到以色列各地區去。若係無人幫助𠊎等，𠊎等就向你投降。」

4使者到掃羅住个基比亞，將消息傳出去。人民全部絕望到大聲噭起來。

5該時，掃羅正對田肚逐牛轉來。佢問：「大家噭麼介？」佢等就將雅比人傳來个消息㧯佢講。

6掃羅聽到這消息，被上帝个靈大大感動，就當發譴。

7佢牽出兩隻牛，將牛剁做細細垤，命令使者帶這兜細垤肉到以色列各地區去，警告人民講：「麼人毋跈掃羅㧯撒母耳去相㓾，麼人个牛就愛剁做恁樣！」

上主使以色列人當著驚；所有个人就同心合意出來作戰。

8掃羅喊佢等在比色集合。有三十萬人對以色列來，三萬人對猶大來。

9佢等對雅比來个使者講：「轉去基列地區㧯你等雅比人講，天光日當晝以前，佢等會得到解救。」雅比人民聽到這消息非常歡喜，

10就對拿轄講：「天光日𠊎等投降，由在你等樣般對待𠊎等。」

11第二朝晨，掃羅將佢个軍隊分做三隊；天一光，就入到亞捫人个營肚攻擊佢等，直到當晝，㓾掉盡多人；還生个士兵全部四散，隨人逃命。

12 以色列人對撒母耳講：「麼人講掃羅無資格做𠊎等个王？將該兜人交出來，𠊎等愛㓾掉佢等！」

13總係掃羅講：「今晡日做毋得㓾人，因為今晡日上主救了以色列。」

14撒母耳對人民講：「𠊎等全部來去吉甲，在該位重新立掃羅做𠊎等个王。」

15所以佢等全部去到吉甲，在上主面前立掃羅做王，又在上主面前獻平安祭。掃羅㧯所有个以色列人大大慶祝這件事。