1下背係有關巴比倫
个信息。就像狂風掃過沙漠，災難會對得人驚个地方來到。
2𠊎看到悲慘个異象接等發生 — 詭詐个還係詭詐；破壞个繼續破壞。
以攔个軍隊啊，衝鋒噢！米底亞个軍隊，攻城噢！上帝愛停止巴比倫帶給人个痛苦。
3𠊎一看到這狀況，聽到這話，就著驚艱苦，像婦人家𫱔細人仔个陣痛共樣。𠊎驚到麼介都看毋到，麼介也聽毋到。
4𠊎个頭那昏昏；𠊎驚到愊愊掣。𠊎平常希望臨暗仔遽遽來到好歇睏，總係這下臨暗仔俾𠊎還較著驚。
5在這異象中，𠊎看到筵席準備好勢，地毯也為人客鋪好了；佢等又啉又食。忽然間，有命令傳來：「各位軍官，拿盾牌 ，準備相㓾！」
6該時，主對𠊎講：「你去，派人守望，吩咐佢將所看到个隨時報告。
7若係佢看到有騎兵兩個兩個過來，還有人騎等驢仔㧯駱駝，就愛注意看詳細。」
8守望个人 大聲喊講：「主啊，𠊎會日夜在這位企衛兵！」
9忽然間，有騎兵兩個兩個上來；守望个人就報告講：「巴比倫橫掉了！橫掉了！佢等所拜个偶像全部被人敲碎在地上。」
10𠊎个猶大同胞啊！你等一溜裡像被人用篩仔篩个麥仔一樣；總係這下𠊎已經報告你等一個好消息，就係𠊎對上主 — 萬軍个元帥、以色列个上帝該位聽來个。
有關以東个信息11下背係有關以東
个信息。有人對以東問𠊎：「掌更个啊！暗晡頭會過吂？暗晡時還有幾久？」
12𠊎應講：「天會光了，總係暗晡頭還會來。若係你還愛問，下二擺正來問。」
有關阿拉伯个信息13下背係有關阿拉伯个信息。
底但个人民啊，在阿拉伯沙漠个樹林中搭帳篷个商隊啊！
14有嘴燥个人到你等面前來，你等愛拿水給佢等啉！在提瑪个人民啊，有難民來到，你等愛拿給佢等食！
15這兜人全部係無被刀仔㓾到、無被弓箭射到，在戰爭中逃命出來个難民。
16所以主對𠊎講：「在一年內，照長工个年限，基達部落个興旺就愛停掉。
17基達人中最勇敢个係弓箭手；佢等个數目也會減少，賸無幾個。𠊎 — 上主、以色列个上帝恁樣宣佈了。」
Who We AreWhat We EelieveWhat We Do
2025 by iamachristian.org,Inc All rights reserved.
