傳道書 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

毋好隨便許願

1你到上帝个聖殿去，愛謹慎自家个腳步。行前去聽從上帝，較贏該兜無明白是非个戇仔所獻个祭。

2你開嘴前愛先想一下，毋好隨便向上帝許願。佢在天頂，你在地上，所以你毋使講恁多話。

3事情多，夢就多；講多，戇話就走出來。

4你向上帝許願，愛遽遽還願；因為佢無歡喜戇人，所以你許願就愛還願。

5許願毋還，就莫許願較好。

6毋好俾你自家个話害你犯罪，也毋好到上帝个祭司 面前講你許毋著願了。做麼介惹上帝發譴呢？做麼介俾佢毀壞你手所做个工作呢？

7發夢多，講話多，全部係空虛；你只愛敬畏上帝。

人生个空虛

8你看到政府欺負窮苦人，無用公道款待佢等，毋尊重佢等个權利，你毋使恁著驚。逐個官員全部有比佢地位較高个在保護佢，佢等逐儕也愛受還較高个官員个保護。

9無論人民抑係君王，全部愛靠田地个出產來得利益 。

10愛錢个人毋會滿足佢个財富；想愛發財个人毋會滿足佢个收入。這也係空虛。

11你越好額，靠你食飯个人越多。你个錢財對你有麼介利益呢？俾你看定定。

12勞動个人無論食多食少，還係當好睡；有錢人个豐富顛倒害佢睡毋落覺。

13在日頭下𠊎看到一件悲慘个事：有人積存錢財，反轉害到自家。

14事業做無順，了掉財富，結果無財產留給子孫。

15佢赤身露體出母胎，也愛赤身露體倒轉去。無論在世樣般勞碌，麼介東西也帶毋走。

16這也係當悲慘个事。來个時樣般，去个時也樣般。操心勞苦去捉風，到底有麼介價值呢？

17總係，佢一生人在烏暗、憂愁中，有當多操煩、病痛、㧯發閼。

18𠊎个看法係：美好个人生就係在上帝所賜短暫个一生中有好食，有好啉，享受在日頭下勞碌得个成果；這就係人个命運。

19若係上帝賜給人錢財產業，俾佢享受，佢就應當接受這個福份，在勞碌中歡喜快樂。這係上帝个恩賜。

20既然上帝俾佢恁歡喜快樂，佢毋使緊愁自家一生个年日。