1上主㧯𠊎講話；
2佢講：「人子啊，愛㧯你个同胞講，逐擺𠊎使一個國家堵到戰亂，該國个人民會選出一儕來做守望者。
3守望者看到敵人來攻擊該地，就歕羊角警告人民。
4若係有人聽到警報毋搭它，被敵人㓾死，佢个罪就歸自家。
5因為佢毋搭警報，佢个罪就歸自家。若係佢接受警報，佢一定會救到自家个命。
6總係，守望者若係看到敵人來攻擊該地，無歕羊角，敵人來到，㓾死佢等當中个人，就算被敵人㓾死个係罪人，𠊎也愛向守望者來討血債。
7「人子啊，𠊎這下派你做以色列人个守望者。你一定愛將𠊎親身㧯你講个話警告佢等。
8若係𠊎宣佈某一個壞人一定愛死，你毋去警告佢，勸佢棄邪歸正，佢雖然會因為自家个罪死掉，𠊎卻愛追究你流厥血个責任。
9若係你警告該壞人，佢毋肯改過，還係做壞事，佢愛因為自家个罪死掉，總係你會救到自家个命。」
個人个責任10上主㧯𠊎講：「人子啊，你愛對以色列人講：『你等常常講：𠊎等个罪惡過犯就像擔頭磧在𠊎等身上，𠊎等定著會漸漸消滅掉，樣能生存下去呢？』
11㧯佢等講，𠊎 — 至高个上主指等𠊎永遠个生命發誓，𠊎毋歡喜看到壞人死掉，𠊎較歡喜看到佢悔改來生存。以色列人啊，你等愛悔改，離開壞行為！你等樣愛使去死哪？
12「人子啊，愛㧯以色列人講，好人犯罪，佢以前所做个好事無法度救佢。壞人悔改，毋使受刑罰；好人犯罪，也做毋得因為佢識行過好事就毋使死。
13就算𠊎應許好人佢一定會有生命，若係佢恅到自家已經做盡多好事就開始犯罪，𠊎絕對毋會紀念佢以前个好行為。佢一定愛因為自家个罪來死。
14就算𠊎警告壞人佢一定會死，若係佢悔改，做正直公當个事，
15就像將人拿來抵押个東西歸還原主，抑係將偷來个東西歸還原主 — 佢悔改，遵行賜生命个法律，佢就毋會死，反轉會有生命。
16𠊎愛赦免佢所犯个一切罪；佢一定愛因為自家所做正直公當个事來生存。
17「雖然你个同胞講𠊎恁樣做無公平，其實，佢等所做个正係無公平。
18好人無再做好事，反轉去做壞事，佢一定會因為恁樣來死。
19壞人悔改，做正直公當个事，佢就一定會因為恁樣來救到生命。
20以色列人啊，你等講：『主恁樣做無公平。』總係𠊎愛照你等逐儕个行為來審判你等。」
耶路撒冷陷落个消息21𠊎等被人捉去个第十二年十月初五，有一個對耶路撒冷走出來个難民來㧯𠊎講：「耶路撒冷陷落了！」
22這個人來个前一暗晡，上主个靈降 在𠊎身上，開𠊎个嘴。第二朝晨，這個人來到以前，上主已經恢復𠊎講話个能力。
人民个罪23上主㧯𠊎講話；
24佢講：「人子啊，以色列境內該兜荒涼所在个人民講：『亞伯拉罕一儕就得到這垤土地，𠊎等人數恁多，還較應該得到這垤土地做產業。』
25「你愛㧯佢等講，𠊎 — 至高个上主恁樣講：你等食帶血个肉，拜偶像，㓾人流血，你等憑麼介還敢講這垤土地係你等个呢？
26你等倚靠武力，做邪惡个事，儕儕強姦鄰舍个𡜵娘，你等憑麼介還敢講這垤土地係你等个呢？
27「你愛㧯佢等講，𠊎 — 至高个上主指等𠊎永遠个生命發誓講：住在荒涼所在个人民會被人㓾死；住在野外个人會被野獸食掉；囥在山頂要塞抑係山窿肚个人會發瘟死掉。
28𠊎愛使這地徹底荒廢；佢等所誇口个力量全部會無掉。以色列个山地會徹底荒掉，無人經過該位。
29𠊎因為佢等所行一切邪惡个事，使土地徹底荒廢个時，佢等就會知𠊎係上主。」
先知傳講信息个結果30上主講：「人子啊，你个同胞在城牆堘抑係屋門口聚集个時，全部在該位講你。佢等互相講：『𠊎等來去聽看，上主愛講麼介話！』
31所以𠊎个子民弛崗打陣，愛聽你講。總係佢等聽了，毋去實行。佢等嘴講欣慕你个話，還係共樣過貪心个生活。
32在佢等來看，你係一個歌手定定，單淨會唱情歌，彈豎琴。你个話，佢等逐句有聽到，總係一句也毋去實行。
33當你所講个話實現了 — 看啊，一定會實現 — 該時佢等就會知有一個先知在佢等當中。」
Who We AreWhat We EelieveWhat We Do
2025 by iamachristian.org,Inc All rights reserved.
