1以下係神人摩西過身以前，向以色列人民祝福个話。
2佢講：
上主對西奈山來；
佢像日頭對以東出來，
對巴蘭山光照自家个子民。
千千萬萬个天使跈等佢；
佢正手擎等當猛个火把。
3上主惜佢个子民 ；
佢保護佢个聖民。
𠊎等伏在佢个腳前，
全心接受佢个教訓。
4 摩西將上主个法律頒佈給𠊎等；
該係雅各个後代最寶貝个產業。
5當以色列各支族个領袖聚集共下，
該時上主做佢正直个子民 个君王。
6 摩西祝福呂便支族，講：
呂便个人數雖然較少兜仔，
願佢等永遠存在毋會滅亡。
7佢祝福猶大支族，講：
上主啊，求你聽猶大个哀求，
使佢等㧯其他支族重新聯合。
猶大个支族愛為自家作戰；
願上主幫助佢等征服敵人。
8佢祝福利未支族，講：
上主啊，求你通過利未支族
用烏陵土明啟示你个旨意；
佢等係你忠誠个子民。
你識在瑪撒考驗過佢等，
在米利巴泉水滣爭論過。
9佢等對爺𡟓、兄弟、子女，
無像對你表現个忠心。
佢等遵行你个誡命；
佢等堅守你立个約。
10佢等愛教以色列人遵行你个法律誡命，
也愛在你面前燒香，在祭壇頂獻燒化祭。
11上主啊，願你使佢等強盛；
求你愛接納佢等个工作。
求你愛攻擊該兜怨恨佢等个敵人，
打傷敵人个腰骨，使佢等䟘毋起來。
12佢祝福便雅憫支族，講：
上主痛惜並保護便雅憫；
佢一定會歸日保護佢等，
佢等在佢个手中有平安 。
13佢祝福約瑟支族，講：
願上主賜福佢等个土地，
對天頂降下甘霖，
對地下湧出泉水。
14願佢等个田園日光充足，年年豐收，
願佢等个土地逐隻月出產好果子。
15願佢等个老山嶺
永遠果樹滿遍係。
16在𤏸等个竻藪肚呼召𠊎个上主啊，
大大賜福給佢等，使佢等全地豐收。
願這兜福氣臨到約瑟支族，
因為佢係兄弟當中个領袖。
17 約瑟有牛牯个氣力，
有野牛个角；
一支角係瑪拿西个千千，
一支角係以法蓮个萬萬；
佢愛用佢等征服萬國，
將萬民逐到地極。
18佢祝福西布倫㧯以薩迦支族，講：
願西布倫个生理發展到海外；
願以薩迦在本地个財富增加。
19佢等邀請列國到佢等山頂，
在該位獻各種應該獻个祭。
佢等對大海將財產運轉來，
對沙灘該位將寶貝搬轉去。
20佢祝福迦得支族，講：
上帝應當得到稱頌，
佢擴張迦得个土地。
迦得就像獅仔伏等，
愛揪下獵物个腳髀，
愛剝掉牠个頭那皮。
21佢等為自家擇最好个土地，
就係領袖應該得到个一份。
以色列該兜領袖聚集个時，
佢等遵行上主个法律誡命。
22佢祝福但支族，講：
但就係細个獅仔，
對巴珊山猋出來。
23佢祝福拿弗他利支族，講：
拿弗他利得到上主个大恩㧯慈愛；
佢等个地界對加利利湖向南擴展。
24佢祝福亞設支族，講：
亞設所得个祝福超過別族；
願佢等在兄弟當中得人惜；
願佢等个土地生滿橄欖樹。
25願佢等个城鎮有銅門鐵閂保護；
願佢等在世間个日仔充滿力量。
26 以色列啊 ，別个神明㧯你个上帝比毋得。
佢坐等雲來幫助你；
佢个威嚴飛過天空。
27永生个上帝係你个避難所；
佢个雙手永遠支持你。
佢為你逐走敵人；
佢命令滅掉佢等。
28 以色列會安居樂業，
雅各子孫享受太平，
住在五榖新酒豐收个所在，
天頂甘霖滋潤佢等个土地。
29 以色列啊，你等樣般恁有幸福！
上主拯救个人民，麼人比抑得？
上主係你等个盾牌、刀劍；
佢保護你等，使你等得勝。
你等个敵人愛向你等投降；
你等愛踏在佢等个背囊頂。
Who We AreWhat We EelieveWhat We Do
2025 by iamachristian.org,Inc All rights reserved.
