1上主講：「人子啊，你愛向以色列个山傳講𠊎个信息，喊佢等聽𠊎个話。
2𠊎 — 至高个上主恁樣講：以色列个敵人識恥笑你等講：『還好噢！該兜古老个山嶺全部歸𠊎等了！』
3「所以，你愛講預言，宣佈𠊎 — 至高个上主恁樣講：四圍个國家踐踏你等，使你等荒涼，佔領你等，你等被人嘲謔、譭謗。
4所以，以色列你這兜大山、細山、河壩、山壢、無用个荒埔㧯被四圍个國家佔領侮辱个城市啊，你等全部愛聽𠊎 — 至高个上主對你等講个話。
5「𠊎 — 至高个上主發譴責備四圍个國家，特別係以東。佢等歡喜吶天、當看輕𠊎，佔領𠊎个土地，準做自家个產業。
6「所以，你愛對以色列个土地講預言；愛㧯大山細山、河壩、山壢講：因為佢等被列國侮辱，𠊎 — 至高个上主當發譴。
7所以𠊎 — 至高个上主擎手發誓講：你四圍个國家一定愛受侮辱。
8總係，以色列个山啊，你等个樹仔會再一擺靚起來，為𠊎个子民結出果子。𠊎个子民啊，你等當遽就會轉故鄉了。
9𠊎愛幫助你等，轉向你等；𠊎保證你等个土地會有好犁田委種。
10𠊎愛使你等个人口增加；你等愛住在城肚，重建家園。
11𠊎愛使人㧯六畜興旺；你等會多子多孫，人口比以前加盡多。𠊎愛俾你等住在以前住過个所在，使你等比以前更加繁榮。恁樣，你等就會知𠊎係上主。
12𠊎个子民以色列啊，𠊎愛帶你等轉來，俾你等重新住在以色列个土地。它會成做你等自家个土地，毋會再俾你等个子女餓到。
13「𠊎 — 至高个上主講：人民講這垤土地會食人，係會害人亡國、絕子絕孫个土地。
14總係，從今以後這垤土地毋會再食人，毋會再害你等亡國、絕子絕孫。𠊎 — 至高个上主恁樣宣佈了。
15這垤土地毋會再害你等被外國人侮辱，被人嘲謔，也毋會再害你等亡國。𠊎 — 至高个上主恁樣宣佈了。」
以色列个新生活16上主又㧯𠊎講話；
17佢講：「人子啊，以色列人住在佢等本國个時，佢等个生活㧯行為打垃圾該垤土地。在𠊎眼中，佢等个行為當像經期中个婦人家恁樣無淨浰 。
18佢等在該垤土地上㓾人，拜偶像，打垃圾土地，所以𠊎向佢等拚出𠊎个大發譴。
19𠊎因為佢等無淨浰个生活㧯行為責罰佢等，將佢等逐到外國去，分散到天下。
20佢等無論到㖠位就害𠊎个聖名受羞辱；該兜人議論講：『這兜人敢毋係上主个子民，樣會離開上主个土地呢？』
21以色列人無論流浪到㖠位，就害𠊎个聖名受羞辱，總係𠊎還係惜𠊎个聖名。
22「所以，你愛㧯以色列人講，𠊎 — 至高个上主恁樣講：以色列人啊，𠊎愛做个事毋係為你等，係為𠊎自家个聖名，就係你等在各國所羞辱个名。
23你等識在列國中害𠊎个聖名受羞辱；𠊎愛用你等證明，給佢等看𠊎个名係神聖个。恁樣，列國就會知𠊎係上主。𠊎 — 至高个上主恁樣宣佈了。
24𠊎愛帶領你等離開各國；𠊎愛對逐所在將你等召集起來，帶你等轉故鄉。
25𠊎愛用淨浰个水洒你等，俾你等淨浰。𠊎愛洗掉你等所有个屙糟，除掉你等所有个偶像。
26𠊎愛賜給你等新个心，將新个靈放在你等底背；𠊎愛除掉你等像石頭恁硬个心，賜給你等有血有肉个心。
27𠊎愛將𠊎个靈放在你等底背，使你等會遵行𠊎个法律，專心服從𠊎个誡命。
28恁樣，你等就會住在該垤𠊎賜給你等祖先个土地上。你等愛做𠊎个子民；𠊎愛做你等个上帝。
29𠊎愛救你等脫離所有个污穢。𠊎愛喊五榖豐收，𠊎毋會再俾你等堵到飢荒。
30𠊎愛使你等个果樹結果子多多，田園增加生產，你等就毋會再因為飢荒受到列國个侮辱。
31你等會想到自家个壞行為㧯所犯个過失，又因為自家个罪惡盡惱自家。
32以色列人啊，𠊎 — 至高个上主愛你等知，𠊎做這一切毋係為到你等。你等愛為自家所做个感覺盡見笑。」
33至高个上主恁樣講：「𠊎洗淨你等个罪以後，愛俾你等住在城肚，重建家園。
34以前，過路个人全部講你等个土地樣會恁荒涼，總係𠊎愛俾你等重新耕種這田地。
35佢等會講，以前像曠野个田地，這下像伊甸園；以前被人廢掉、破壞个荒城，這下人口眾多，城堡堅固了。
36該時，四圍還吂滅亡个鄰國就會知𠊎 — 上主重新建設荒城，重新耕種荒地。𠊎 — 上主恁樣宣佈了。𠊎講過个，𠊎一定會實行。」
37至高个上主恁樣講：「𠊎愛喊以色列人再向𠊎祈求幫助；𠊎愛使佢等个人口像羊群恁樣增加。
38荒掉个城市會充滿人群，就像以前耶路撒冷在節期个時尖滿獻祭用个羊群共樣。恁樣，佢等就會知𠊎係上主。」
Who We AreWhat We EelieveWhat We Do
2025 by iamachristian.org,Inc All rights reserved.
